ទូតកម្ពុជា៖ ពលរដ្ឋខ្មែរដែលជាប់នៅម៉ាឡេស៊ី មិនទាន់បានធ្វើតេស្តរកកូវីដ១៩ទេ ដោយសារតែមិនមានថវិកា
គិតមកដល់ពេលនេះ ប្រជាពលរដ្ឋខ្មែរចំនួនប្រមាណ១៤៣នាក់ដែលចង់មកប្រទេសកម្ពុជាវិញនោះ គឺកំពុងជាប់នៅក្នុងប្រទេសម៉ាឡេស៊ីនៅឡើយ។ ស្ថានទូតកម្ពុជាប្រចាំនៅម៉ាឡេស៊ី បានអះអាងប្រាប់វិទ្យុបារាំងអន្តរជាតិនៅព្រឹកថ្ងៃអង្គារនេះថា ពួកគេទាំងនេះមិនទាន់បានទៅធ្វើតេស្តរកជំងឺកូវីដ-១៩នោះទេ ដោយសារតែមិនមានថវិកា ព្រោះអាជ្ញាធរម៉ាឡេស៊ីគិតថ្លៃលើការធ្វើតេស្តរកជំងឺកូវីដ-១៩នេះ។ ការធ្វើតេស្តរកជំងឺកូវ៌ដ-១៩នៅក្នុងប្រទេសម៉ាឡេស៊ី គឺចន្លោះពី១០០ទៅ១៥០ដុល្លារអាមេរិក។
ចុះផ្សាយនៅថ្ងៃ៖
ស្តាប់ - ០២:១៣
លោកចឺយ វិចិត្ត ឯកអគ្គរាជទូតកម្ពុជាប្រចាំនៅប្រទេសម៉ាឡេស៊ីបានគូសបញ្ជាក់ឱ្យដឹងថា ប្រជាពលរដ្ឋនៅជាប់នៅប្រទេសម៉ាឡេស៊ីមិនទាន់បានទៅធ្វើរកតេស្តរកជំងឺកូវីដ-១៩នៅឡើយទេ ដោយហេតុថា ពួកគេមិនមានថវិកាគ្រប់គ្រាន់។ លោកថា ស្ថានទូតកម្ពុជាបានស្នើឱ្យអាជ្ញាធរម៉ាឡេស៊ីធ្វើតេស្តរកជំងឺកូវីដ-១៩លើជនជាតិកម្ពុជាទាំងអស់ដោយមិនយកថ្លៃ។ ប៉ុន្តែ អាជ្ញាធរម៉ាឡេស៊ីបានបដិសេធ ដោយតម្រូវឱ្យបង់ប្រាក់ដើម្បីធ្វើតេស្តដូចគ្នា។ ក្រោយការបដិសេធនេះ ឯកអគ្គរាជទូតកម្ពុជាប្រចាំនៅប្រទេសម៉ាឡេស៊ីក៏បានស្នើមកកាន់រដ្ឋាភិបាលកម្ពុជា ដើម្បីស្នើសុំថវិកាសម្រាប់ឱ្យប្រជាពលរដ្ឋទាំងនោះមានលទ្ធភាពទៅធ្វើតេស្តរកជំងឺកូវីដ-១៩ ។ ប៉ុន្តែ មិនទាន់មានការឆ្លើយយ៉ាងណានៅឡើយទេ។ នេះបើតាមលោកចឺយ វិចិត្ត។
គួរជម្រាបជូនថា ប្រជាពលរដ្ឋខ្មែរកំពុងជាប់នៅក្នុងប្រទេសម៉ាឡេស៊ីមានចំនួន១៤៣នាក់។ ក្រសួងសុខាភិបាលកម្ពុជា បានអះអាងថា ពលរដ្ឋខ្មែរដែលនៅជាប់ក្នុងប្រទេសម៉ាឡេស៊ីទាំងនេះ គឺ អាចចចូលមកស្រុកវិញបានលុះត្រាណាមានលិខិតបញ្ជាក់ថា គ្មានឆ្លងជំងឺកូវីដ-១៩។ ក្រៅពីនេះ នៅពេលពួកគេមកដល់ប្រទេសកម្ពុជា នឹងត្រូវធ្វើការត្រួតពិនិត្យរកជំងឺកូវីដ-១៩ជាថ្មី និង ត្រូវធ្វើចត្តាឡីស័កនៅមណ្ឌលចត្តាឡីស័កនៅក្នុងរាជធានីភ្នំពេញរយៈពេល១៤ថ្ងៃសិន។
បន្ថែមពីលើការធ្វើចត្តាឡីស័ក១៤ថ្ងៃនៅភ្នំពេញនេះ ពួកគេទាំងអស់នេះក៏តម្រូវឱ្យធ្វើចត្តាឡីស័កនៅក្នុងផ្ទះរយៈពេល១៤ថ្ងៃទៀតនៅឯស្រុកកំណើតផងដែរ។ ការធ្វើបែបនេះ គឺដើម្បីឱ្យប្រាកដថា ពួកគេទាំងនេះមិននាំចូលជំងឺកូវីដ-១៩ មកចម្លងដល់ប្រជាពលរដ្ឋនៅក្នុងស្រុក ពីព្រោះថា ម៉ាឡេស៊ី គឺជាប្រទេសហានិភ័យខ្ពស់នៃជំងឺកូវីដ-១៩នេះ។ នេះបើតាមការបញ្ជាក់របស់លោកម៉ម ប៊ុនហេង រដ្ឋមន្រ្តីក្រសួងសុខាភិបាលកម្ពុជា។
ស្របពេលដែលស្ថានទូតកម្ពុជាកំពុងរង់ចាំការសម្រេចរបស់រដ្ឋាភិបាលក្នុងការផ្តល់ថវិកាសម្រាប់ការធ្វើតេស្តរកជំងឺកូវីដ-១៩ដល់ពលរដ្ឋខ្មែរនៅម៉ាឡេស៊ីនេះ លោកចឺយ វិចិត្រ ក៏បានអះអាងថា លោកកំពុងសម្របសម្រួលជាមួយអាជ្ញាធរម៉ាឡេស៊ី ដើម្បីឱ្យមានជើងហោះហើរមកកាន់កម្ពុជាសម្រាប់ឱ្យពលរដ្ឋខ្មែរអាចធ្វើដំណើរមកកាន់ស្រុកកំណើតវិញបាន បន្ទាប់ពីធ្វើតេស្តរកជំងឺកូវីដ-១៩។ បើតាមលោកចឺយ វិចិត្ត អាជ្ញាធរម៉ាឡេស៊ីគ្រោងបើកឱ្យមានជើងហោះហើរឡើងវិញនៅក្នុងខែកក្កដា ខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ