កូវីដ១៩នៅកម្ពុជា៖ អ្នកជំងឺទាំងអស់ជាសះស្បើយនិងគ្មានករណីវិជ្ជមានថ្មី!
នៅទូទាំងប្រទេសកម្ពុជា មិនមានអ្នកជំងឺកូវីដ១៩កំពុងសម្រាកព្យាបាលទៀតឡើយ បន្ទាប់ពីអ្នកជំងឺកូវីដ១៩ចុងក្រោយត្រូវបានព្យាបាលឲ្យជាសះស្បើយនិងបានចាកចេញពីមន្ទីរពេទ្យរួចមក។ នេះគឺជាការបញ្ជាក់របស់ក្រសួងសុខាភិបាល តាមរយៈសេចក្ដីប្រកាសព័ត៌មានចុះថ្ងៃទី១៦ ឧសភានេះ។ សេចក្ដីជូនដំណឹងដដែលបានរំឭកឲ្យពលរដ្ឋខ្មែរបន្តប្រុងប្រយ័ត្ន និងអនុវត្តវិធានការការពារការចម្លងឲ្យបានជាប់ជានិច្ច បើទោះបីជាកម្ពុជាពុំមានរកឃើញករណីកូវីដ១៩ថ្មីក៏ដោយ។
ចុះផ្សាយនៅថ្ងៃ៖
ស្តាប់ - ០២:៣៤
នៅទីបំផុតទៅ អ្នកជំងឺកូវីដ១៩ទាំងអស់ដែលរកឃើញនៅកម្ពុជាត្រូវបានព្យាបាលឲ្យជាសះស្បើយ ហើយមិនមានអ្នកស្លាប់ដោយសារជំងឺកូវីដ១៩នេះនៅកម្ពុជាទេ។ បើតាមការគូសបញ្ជាក់ពីក្រសួងសុខាភិបាល គិតត្រឹមថ្ងៃទី១៦ឧសភានេះ ពុំមានអ្នកជំងឺកូវីដ១៩សូម្បីម្នាក់សម្រាកព្យាបាលនៅមន្ទីរពេទ្យឡើយ ដោយអ្នកជំងឺចុងក្រោយ ទី១២២ បានចាកចេញពីមន្ទីរពេទ្យមិត្តភាពខ្មែរសូវៀត បន្ទាប់ពីធ្វើតេស្តន៍រកមេរោគទទួលបានលទ្ធផលអវិជ្ជមានកូវីដ១៩ចំនួន២ដង។
ទន្ទឹមនឹងការព្យាបាលអ្នកជំងឺកូវីដ១៩ទាំងអស់ឲ្យជាសះស្បើយ កម្ពុជាក៏មិនមានករណីកូវីដ១៩ថ្មីបន្ថែមទៀតដែរ។ បើទោះបីជាយ៉ាងដូច្នេះក៏ដោយ ក្រសួងសុខាភិបាលនៅតែក្រើនរំឭកឲ្យប្រជាពលរដ្ឋបន្តប្រុងប្រយ័ត្ន និងអនុវត្តវិធានការការពារការចម្លងឲ្យបានជាប់ជានិច្ច។ និងថា ករណីវិជ្ជមានកូវីដ១៩នឹងអាចរកឃើញនាពេលខាងមុខ ប្រសិនបើពលរដ្ឋទាំងអស់ធ្វេសប្រហែស មិនបានការពារខ្លួនទៅតាមការណែនាំរបស់អ្នកជំនាញ។
សូមជម្រាបជូនថា កម្ពុជាមានករណីកូវីដ១៩សរុបចំនួន១២២ករណី (ស្រី៣៨នាក់និងបុរស៨៤នាក់) ដោយក្នុងនោះ ករណីដំបូងបង្អស់ត្រូវបានរកឃើញនៅថ្ងៃទី២៧មករាឆ្នាំ២០២០ លើបុរសជនជាតិចិនដែលធ្វើដំណើរពីទីក្រុងវូហានមកកាន់ខេត្តព្រះសីហនុ។ ករណីកូវីដ១៩នៅកម្ពុជា បានកើនឡើងយ៉ាងគំហុកក្នុងខែមីនា ដោយគិតត្រឹមថ្ងៃទី៣១មីនា កម្ពុជាមានករណីកូវីដ១៩រហូតដល់១០៩ករណី។ ប៉ុន្តែយ៉ាងណាក៏ដោយ ការរកឃើញថ្មីបានថយល្បឿនមកវិញ ហើយឈប់នឹងថ្កល់ត្រឹម១២២ករណី នៅថ្ងៃទី១២ខែមេសា។ ករណីកូវីដ១៩នៅកម្ពុជា ត្រូវបានក្រសួងជំនាញសន្និដ្ឋានថា ភាគច្រើនលើសលុបជាការនាំចូលពីក្រៅប្រទេស។
ចំពោះការធ្វើតេស្តន៍ស្វែងរកជំងឺកូវីដ១៩វិញ ចាប់ពីខែមករា រហូតដល់ថ្ងៃទី១៥ឧសភា ក្រសួងសុខាភិបាលអះអាងថា កម្ពុជាបានធ្វើវិភាគលើវត្ថុសំណាកចំនួន១ម៉ឺន៤ពាន់៦៨៤សំណាកនៅទូទាំងប្រទេស ឬស្មើនឹង៩០៣សំណាកក្នុងចំណោមប្រជាជនមួយលាននាក់ ដែលជាចំនួនច្រើនជាងបណ្ដាប្រទេសមួយចំនួននៅក្នុងតំបន់អាស៊ាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ