កម្ពុជាបើកឲ្យនាំអង្ករសទៅក្រៅប្រទេសឡើងវិញ បន្ទាប់ពីការលក់អង្ករកម្ពុជានៅដើមឆ្នាំនេះមានលទ្ធផលល្អ
រដ្ឋាភិបាលកម្ពុជានៅថ្ងៃទី១៣ខែឧសភានេះ បានអនុញ្ញាតឲ្យអ្នកធ្វើធុរកិច្ចខាងវិស័យស្រូវអង្ករ អាចនាំចេញអង្ករស ទៅលក់នៅបរទេសឡើងវិញ បន្ទាប់ពីបានប្រកាសបិទការនាំចេញកាលពីខែមីនា ដើម្បីរក្សាស្បៀងទុកនៅក្នុងដំណាក់កាលកូវីដ១៩។ ការអនុញ្ញាតឲ្យនាំអង្ករសកម្ពុជាចេញទៅក្រៅប្រទេសពេលនេះ ធ្វើឡើងបន្ទាប់ពីកម្ពុជាមានភាពស្ងប់ស្ងាត់ការឆ្លងកូវីដ១៩ ហើយអង្ករកម្ពុជាកំពុងតែលក់ដាច់នៅអំឡុងពេលនេះផងដែរ។
ចុះផ្សាយនៅថ្ងៃ៖
ស្តាប់ - ០២:០៨
នៅក្នុងលិខិតដែលមានខ្លឹមសារ៣បន្ទាត់ លោកឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានបញ្ជាក់ប្រាប់ទៅប្រធានសហព័ន្ធស្រូវអង្ករកម្ពុជាថា តាមសំណើររបស់សហព័ន្ធស្រូវអង្ករកម្ពុជា រាជរដ្ឋាភិបាលសម្រេចផ្តល់ការអនុញ្ញាតឲ្យធ្វើការនាំចេញអង្ករសជាបណ្តើរៗឡើងវិញ តាមកិច្ចសន្យាបញ្ជាទិញពីក្រៅប្រទេស ដោយគិតចាប់ពីថ្ងៃទី២០ ខែឧសភាឆ្នាំ២០២០ តទៅ។
សូមរំលឹកថា ដោយសារការរាតត្បាតនៃវីរុសកូវីដ១៩ កាលពីចុងខែមីនាកន្លងទៅ លោកនាយករដ្ឋមន្ត្រី ហ៊ុន សែន បានប្រកាសផ្អាកនាំអង្ករស និងស្រូវចេញទៅបរទេស ដើម្បីរក្សាស្បៀងទុកផ្គត់ផ្គង់ក្នុងស្រុក ដែលបទបញ្ជានេះត្រូវបានអនុវត្តចាប់ពីថ្ងៃទី៥ខែមេសាមក។ ក៏ប៉ុន្តែប្រភេទអង្ករក្រអូប មិនត្រូវបានហាមឃាត់នោះទេ។
ទោះយ៉ាងណា សហព័ន្ធស្រូវអង្ករកម្ពុជាកាលពីពេលថ្មីៗនេះ បានប្រកាសថា រយៈពេល៤ខែដំបូងដើមឆ្នាំ២០២០នេះ ប្រទេសកម្ពុជាបាននាំចេញអង្ករទៅក្រៅប្រទេសបានជាង៣០ម៉ឺនតោន គឺកើនឡើងប្រមាណ៤១% ធៀបនឹងរយៈពេលដូចគ្នា កាលពីឆ្នាំ២០១៩។ អ្នកតាមដានសង្គម និងសេដ្ឋកិច្ចនានាបានមើលឃើញថា ទំនងជាហេតុផលនេះហើយ ដែលកម្ពុជាឆ្លៀតឱកាសនេះ ច្បាមយកទីផ្សារអង្ករឲ្យបានច្រើនបន្ថែមទៀត ខណៈទីផ្សារអង្ករកម្ពុជានៅក្រៅប្រទេសនៅចាញ់ប្រទេសជិតខាងនៅឡើយ ដូចជាថៃ និងវៀតណាមជាដើម។
ប្រធានកុ្រមប្រឹក្សាភិបាលនៃសហព័ន្ធស្រូវអង្ករកម្ពុជា លោកឧកញ៉ា ហ៊ុន ឡាក់ បានប្រាប់វិទ្យុបារាំង RFI កាលពីពេលថ្មីៗនេះដែរថា ដោយសារតែវិបត្តិកូវីដ១៩ ប្រទេសមួយចំនួនបានផ្អាកការនាំចេញ ហើយសកម្មភាពមួយចំនួននៅក្នុងពិភពលោកត្រូវផ្អាក ធ្វើឲ្យមានតម្រូវការផ្នែកស្បៀង។ ដោយឡែកកម្ពុជាមិនបានបិទការនាំចេញទេ ដូច្នេះធ្វើឲ្យមានកំណើននៃការនាំចេញអង្ករកម្ពុជាទៅកាន់ទីផ្សារក្រៅប្រទេស។ លោក ហ៊ុន ឡាក់ បន្ថែមថា មូលហេតុផ្សេងទៀត ដែលនាំឲ្យការនាំចេញអង្ករមានការកើនឡើង គឺតម្លៃស្រូវ និងអង្ករមានតម្លៃល្អ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ