អ្នកគាំទ្របក្សប្រឆាំងនៅក្រៅប្រទេសបង្កើតចលនាថ្មី បង្រួបបង្រួមអ្នកប្រជាធិបតេយ្យ
ចលនាថ្មីមួយដែលមានឈ្មោះថា «រណសិរ្សប្រជាធិបតេយ្យរួបរួម» ត្រូវបានផ្តួចផ្តើមគំនិតបង្កើតឡើង ដោយលោក យឹម ស៊ីណន ប្រធានចលនាយុវជននៃអតីតគណបក្សសង្គ្រោះជាតិនៅកូរ៉េខាងត្បូង។ចលនាថ្មីនេះបង្កើតឡើងនៅពេលដែលអ្នកនយោបាយរបស់អតីតបក្សប្រឆាំងមួយនេះ ត្រូវបានគេមើលឃើញថា កំពុងជ្រកក្រោម«ប៉ូលនយោបាយ»ផ្សេងគ្នា បន្ទាប់ពីគណបក្សសង្គ្រោះជាតិត្រូវរំលាយនៅចុងឆ្នាំ២០១៧។
ចុះផ្សាយនៅថ្ងៃ៖
ស្តាប់ - ០១:៥៦
លោក យឹម ស៊ីណន ជាអ្នកផ្តើមគំនិតបង្កើត«រណសិរ្សប្រជាធិបតេយ្យរួបរួម»នេះថ្លែងប្រាប់វិទ្យុបារាំងអន្តរជាតិRFIនៅថ្ងៃអាទិត្យនេះថា ការបង្កើតចលនានេះគឺដើម្បីបង្រួបបង្រួមអ្នកប្រជាធិបតេយ្យដែលចង់បានការបោះឆ្នោតនៅកម្ពុជាមាន«ស្តង់ដាតែមួយ»ឬមានយុត្តិធម៌ក្នុងការប្រកួតប្រជែងគ្នា។
នៅពេលសួរថា តើចលនាថ្មីនេះ ខុសគ្នានឹង«ចលនាប្រជាធិបតេយ្យសង្គ្រោះជាតិ»របស់លោក សម រង្ស៊ី ដែលត្រូវបានបង្កើតរួចហើយឬយ៉ាងណា? លោក ស៊ីណន បានពន្យល់ថា ចលនាថ្មីនេះគឺបើកទូលាយឲ្យអ្នកប្រជាធិបតេយ្យក្រៅតែពីសមាជិកគណបក្សសង្រ្គោះជាតិអាចចូលរួមបាន។ តែលោកក៏បានបដិសេធនូវការលើកឡើងថា ចលនាថ្មីនេះនឹងនាំអ្នកគាំទ្រទៅឲ្យអាជ្ញាធរចាប់ខ្លួនដូចអ្វីដែលអ្នកគាំទ្រមួយចំនួនរបស់លោក សម រង្ស៊ី ជួបប្រទះក្នុងព្រឹត្តិការណ៍៩វិច្ឆិកានោះឡើយ។
បើយោងតាមនិមិត្តសញ្ញាចលនាថ្មីនៃ«រណសិរ្សប្រជាធិបតេយ្យរួបរួម»នេះ គឺមានរូបភាពផ្គូរផ្គងនាំមុខដោយ លោក សម រង្ស៊ី និងលោក កឹម សុខា រួមទាំងសមាជិកនិងអ្នកគាំទ្រចេញមុខរបស់អតីតគណបក្សសង្គ្រោះជាតិជាច្រើននាក់ទៀត។ ក្រៅពីនោះ ក៏មានការផ្គូរផ្គងផងដែរ នូវរូបភាពអ្នកវិភាគដូចជា លោក មាស នី លោក គឹម សុខ លោក ធន សារាយ លោក រ៉ុង ឈុន លោក ហុង លីម លោក យ៉ង សាំងកុមារ លោក គង់ គាំ និងលោក ព្រាប កុល ជាដើម។
យ៉ាងណាក៏ដោយ លោក ព្រាប កុល បានប្រតិកម្មថា ការបង្កើតសង្វៀននយោបាយថ្មីនេះ ជាគោលការណ៍ លោកគាំទ្រ។ គឺគាំទ្រដំណោះស្រាយនយោបាយណា ដែលអាចនាំឱ្យខ្មែរមានឯកភាពជាតិ និងសាមគ្គីជាតិ ដែលអ្នកនយោបាយគ្រប់និន្នាការ អាចប្រកួតប្រជែងគ្នាលើសង្វៀននយោបាយដោយសេរី ស្មើភាព និងដោយយុត្តិធម៌ តាមគោលការណ៍ប្រជាធិបតេយ្យសេរី និងដោយគ្មានការភ័យខ្លាច។ ប៉ុន្តែលោកបានបដិសេធថា ការបង្កើតចលនាថ្មីនេះ មិនមែនជាគំនិតផ្តួចផ្តើមរបស់លោកឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ