អ្នកនាំពាក្យ៖ មិនមានការពន្យាឬលើកពេលក្នុងការត្រួតពិនិត្យនិងពិន័យករណីគ្មានប័ណ្ណបើកបរឡើយ
អ្នកនាំពាក្យអគ្គស្នងការដ្ឋាននគរបាលជាតិ បានចេញសេចក្តីប្រកាសព័ត៌មានមួយនៅព្រឹកថ្ងៃ អាទិត្យ ទី១០ ឧសភានេះ ដោយបានច្រានចោលចំពោះការផ្សព្វផ្សាយព័ត៌មានថា អាជ្ញាធរបានផ្អាកការត្រួតពិនិត្យឯកសារយានយន្ត និងលើកពេលការផាកពិន័យករណីគ្មានប័ណ្ណបើកបរលើរថយន្តនិងម៉ូតូ។ ចំណែកលោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ កាលពីថ្ងៃម្សិលមិញក៏បានប្រកាសដែរថា ការអនុវត្តន៍វិធានការរឹតបន្តឹងការអនុវត្តន៍ច្បាប់ចរាចរណ៍ផ្លូវគោកនឹងបន្តធ្វើ ក្រោយសង្កេតឃើញថា គ្រោះថ្នាក់ចរាចរណ៍បានថយចុះនៅក្នុងរយៈពេល១សប្តាហ៍កន្លងទៅ។
ចុះផ្សាយនៅថ្ងៃ៖
ស្តាប់ - ០២:៥៣
បើតាមសេចក្តីប្រកាសព័ត៌មានរបស់អ្នកនាំពាក្យអគ្គស្នងការដ្ឋាននគរបាលជាតិ បច្ចុប្បន្ននេះ សមត្ថកិច្ចនគរបាលចរាចរណ៍ កំពុងតែអនុវត្តការរឹតបន្តឹងច្បាប់ចរាចរណ៍ផ្លូវគោក តាមស្មារតីអនុក្រឹត្យលេខ ៣៩ ដោយបាននិងកំពុងត្រួតពិនិត្យ និងផាកពិន័យលើប្រភេទបទល្មើសអាទិភាពចំពោះទោចក្រយានយន្ត (ម៉ូតូ) ត្រីចក្រយានយន្តចំនួន០៧ចំណុច និងរថយន្តចំនួន០៩ចំណុច។ ក្នុងនោះ ក៏មានការត្រួតពិនិត្យ និងពិន័យចំពោះករណីគ្មានប័ណ្ណបើកបរយានយន្តផងដែរ។ នេះបើតាមការបញ្ជាក់នៅក្នុងចំណុចទី០២នៃសេចក្តីប្រកាសព័ត៌មាន របស់អ្នកនាំពាក្យអគ្គស្នងការដ្ឋាននគរបាលជាតិ ចុះថ្ងៃទី ១០ ឧសភានេះ។
សេចក្តីប្រកាសព័ត៌មាន ក៏បានបដិសេធចំពោះខ្លឹមសារវីដេអូឃ្លីបរបស់លោកនាយឧត្តមសេនីយ៍ ណេត សាវឿន អគ្គស្នងការនគរបាលជាតិ ដែលមានខ្លឹមសារថា «អគ្គស្នងការនគរបាលជាតិ ប្រកាសលើកពេលពិន័យឡាននិងម៉ូតូ ដែលគ្មានប័ណ្ណបើកបរ»។ បើតាមអ្នកនាំពាក្យ ខ្លឹមសារនៅក្នុងវីដេអូឃ្លីបដែលត្រូវបានបង្ហោះតាមរយៈបណ្តាញសង្គមហ្វេសប៊ុកប៉ុន្មានថ្ងៃមកនេះថា ជាវីដេអូចាស់ តាំងពីថ្ងៃទី ៣១ ធ្នូ ឆ្នាំ ២០១៥ មកម្ល៉េះ។ សម្រាប់អ្នកនាំពាក្យ ការបង្ហោះផ្សព្វផ្សាយឡើងវិញ នូវឃ្លីបសំលេងនេះ អាចធ្វើឲ្យប្រជាពលរដ្ឋមានការយល់ច្រឡំចំពោះការរឹតបន្តឹងច្បាប់ស្តីពីចរាចរណ៍ផ្លូវគោកក្នុងស្ថានភាពថ្មី ហើយក៏អាចមានន័យផងដែរថា មានចេតនាបង្កការរាំងស្ទះដល់ការអនុវត្តច្បាប់របស់សមត្ថកិច្ច និងមានឥទ្ធិពលអវិជ្ជមានដល់បរិយាកាសសង្គមទៀតផង។
គួរជំរាបជូនដែរថា តាមរយៈទំព័រហ្វេសបុករបស់ខ្លួន កាលពីថ្ងៃទី ០៩ ឧសភា លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក ក៏បានប្រកាសដែរថា ការអនុវត្តន៍វិធានការរឹតបន្តឹងការអនុវត្តច្បាប់ចរាចរណ៍ផ្លូវគោកនឹងបន្តធ្វើ បន្ទាប់ពីលោកបានកត់សំគាល់ថា អត្រាគ្រោះថ្នាក់ចរាចរណ៍នៅកម្ពុជាមានការថយចុះ ក្រោយពីការអនុវត្តន៍វិធានការរឹតបន្តឹងច្បាប់ចរាចរណ៍ផ្លូវគោករយៈពេល១សប្តាហ៍រួចមក។
លោក ស ខេង ក៏បានលើកទឹកចិត្តដល់ប្រជាពលរដ្ឋ ឲ្យបន្តចូលរួមផ្តល់ជាមតិយោបល់ក្នុងន័យស្ថាបនា និងកែលំអរថែមទៀត ដើម្បីបន្តការអនុវត្តច្បាប់ចរាចរណ៍ផ្លូវគោកឲ្យកាន់តែល្អប្រសើរឡើង។
យោងតាមរបាយការណ៍ស្តីពីលទ្ធផលនៃការអនុវត្តវិធានការរឹតបន្តឹងការអនុវត្តច្បាប់ចរាចរណ៍ផ្លូវគោករយៈពេល១សប្តាហ៍ បានបង្ហាញថា គ្រោះថ្នាក់ចរាចណ៍បានកើតឡើងចំនួន៤៣លើក មានការថយចុះចំនួន៥២លើក ស្មើនឹង៥៤% បើធៀបនឹងរយៈពេលដូចគ្នា កាលពីខែឧសភាឆ្នាំ២០១៩។ គ្រោះថ្នាក់ចរាចរណ៍ទាំង៤៣លើកនេះ មានអ្នកស្លាប់២៤នាក់ ថយចុះ ១៦នាក់ ស្មើនឹង៤០% មានអ្នករបួស ៥៦នាក់ ថយចុះ ៥៩ នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ