អង្គការចំនួន៣៣ ស្នើឲ្យបញ្ចុះថ្លៃសិក្សា៣៥%និងសាកល្បងបើកសាលារៀននៅតំបន់ដែលគ្មានកូវីដ១៩
អង្គការសង្គមស៊ីវិលចំនួន៣៣ បានចេញសេចក្តីថ្លែងការណ៍រួមមួយកាលពីម្សិលមិញ ដោយអំពាវនាវឲ្យ គ្រឹះស្ថានឯកជនបញ្ចុះថ្លៃសិក្សាដល់សិស្សពីថ្នាក់ទី១ដល់ថ្នាក់ទី១២ចំនួន៣៥ភាគរយប្រចាំឆ្នាំ គឺដោយសារតែអាណាព្យបាលកំពុងជួបវិបត្តិសេដ្ឋកិច្ចអំឡុងពេលកូវីដ១៩នេះ។ ជាមួយគ្នានោះ អង្គការដដែលនេះក៏អំពាវនាវដល់ក្រសួងអប់រំ ឲ្យសាកល្បងបើកសាលារៀនឡើងវិញនៅតំបន់ដែលមិនមានជំងឺកូវីដ១៩កើតឡើង ខណៈអង្គការទាំងនេះអះអាងថា ការសិក្សាតាមអនឡាញមានផលប៉ះពាល់មួយចំនួនដល់កុមារ។
ចុះផ្សាយនៅថ្ងៃ៖
មូលហេតុដែលក្រុមអង្គការទាំងនោះ ស្នើឲ្យសាលារៀនឯកជនបញ្ចុះថ្លៃសិក្សាតាមអនឡាញចំនួន៣៥ភាគរយ គឺដើម្បីជួយសម្រាកបន្ទុករបស់អាណាព្យាបាល ខណៈដែលកុមារត្រូវនៅផ្ទះ នាំឲ្យមានកំណើនការចំណាយទៅលើថ្លៃទឹក ភ្លើង តែអាណាព្យាបាលមួយចំនួនថយចុះប្រាក់ចំណូល។ ការសិក្សាតាមប្រ័ន្ធអេឡិចត្រូនិចនេះ ធ្វើឲ្យកុមារមួយចំនួនមានបញ្ហាប្រឈមដោយគ្រូមិនបានបង្ហាញច្បាស់លាស់ និងគាំទ្រពេញលេញ ស្របគ្នានឹងឳពុកម្តាយខ្លះមិនមានពេលគ្រប់គ្រាន់ក្នុងការបង្ហាត់បង្ហាញ ឬអាណាព្យបាលខ្លះមិនចេះប្រើប្រព័ន្ធបច្ចេកវិទ្យា។ នេះជាការកត់សំគាល់នៅក្នុងសេចក្តីថ្លែងការណ៍ចំនួន៥ទំព័ររបស់អង្គការចំនួន៣៣នេះ។
តាមសេចក្តីថ្លែងការណ៍ដដែល ការរៀនតាមអនឡាញនេះក៏ធ្វើឲ្យកុមាររងការរំលោភបំពានតាមរូបភាពផ្សេងៗក្នុងបណ្តាញអ៊ីនធឺណែត ដែលមិនមានការការពារត្រឹមត្រូវ ហើយកុមារប្រឈមហានិភ័យខ្ពស់ពីសុវត្ថិភាពនៃ ការប្រើប្រាស់នេះ។
ដោយផ្អែកបញ្ហាដែលបានរកឃើញនេះ អង្គការចំនួន៣៣ បានស្នើគ្រឹះស្ថានឯកជនឲ្យបញ្ចុះថ្លៃសិក្សា៣៥%ប្រចាំឆ្នាំសម្រាប់សាលារៀនណាដែលមិនទាន់បានបញ្ចុះថ្លៃ និងស្នើឲ្យក្រសួងអប់រំសាកល្បងបើកសាលារៀនឡើងវិញនៅតំបន់ដែលគ្មានជំងឺកូវីដ១៩។
យ៉ាងណាក៏ដោយ លោក ហង់ជួន ណារ៉ុន រដ្ឋមន្ត្រីក្រសួងអប់រំ បានថ្លែងថា សាលារៀនតាមខេត្តក្រុងត្រូវបានរក្សាទុកជាកន្លែងធ្វើចត្តាឡីស័ក្ត និងត្រៀមបម្រុងសម្រាប់អ្នកជំងឺកូវីដ១៩ ក្នុងករណីមន្ទីរពេទ្យមិនអាចទទួលអ្នកជំងឺអស់។ បើតាមរដ្ឋមន្ត្រីអប់រំ គឺទាល់តែមានសាក់សាំងការពារ ឬថ្នាំព្យាបាលទើបអ្វីៗត្រូវដំណើការជាប្រក្រតីឡើងវិញ ខណៈលោកព្យាយាមបកស្រាយថា ការរស់រានមានជីវិតគឺជាតម្រូវការចាំបាច់ជាងតម្រូវការអប់រំ។
សូមជម្រាបថា សាលារៀននៅកម្ពុជាបានបិទទ្វារតាំងពីពាក់កណ្តាលមីនាមក ដោយសារតែជំងឺកូវីដ១៩។ តែសាលារៀនឯកជនមួយចំនួននៅដំណើការសិក្សាតាមប្រព័ន្ធអនឡាញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ