យុវជនមួយក្រុម ធ្វើកូដកម្មបង្អត់អាហារទាមទារឲ្យ គ្រឹះស្ថានមីក្រូហិរញ្ញវត្ថុពន្យារពេលឲ្យពលរដ្ឋសងបំណុល
ក្រុមយុវជនមួយក្រុមដែលមានទាំងព្រះសង្ឃផង បានជួបជុំគ្នាធ្វើកូដកម្មបង្អត់អាហារពេញមួយថ្ងៃ នៅថ្ងៃសៅរ៍ ទី 0៩ ឧសភា ដើម្បីទាមទារឲ្យរដ្ឋាភិបាលនិងគ្រឹះស្ថានមីក្រូហិរញ្ញវត្ថុពន្យារពេលឲ្យពលរដ្ឋសងបំណុលរបស់ពួកគេក្នុងពេលជួបវិបត្តិនៃជំងឺកូវីដ១៩។ ប៉ុន្តែអ្នកនាំពាក្យសមាគមគ្រឹះស្ថានមីក្រូហិរញ្ញវត្ថុបានឆ្លើយតបថា មិនអាចធ្វើតាមការទាមទារនេះបានទេ។
ចុះផ្សាយនៅថ្ងៃ៖
កូដកម្មបង្អត់អាហារនេះ គឺធ្វើឡើងដោយក្រុមយុវជនមួយក្រុមដែលមានឈ្មោះថា «ខ្មែរថាវរៈ»។ កូដកម្មនេះ បានផ្តើមធ្វើនៅក្នុងខេត្តបាត់ដំបង ដោយយុវជនប្រមាណជា១០នាក់ ក្នុងនោះរួមមានព្រះសង្ឃផង បានចាប់ផ្តើមជួបជុំគ្នានៅរង្វង់មូលលោកតាដំបងគ្រញូង នៅវេលាម៉ោងប្រមាណជា៧ព្រឹក ថ្ងៃទី ០៩ ឧសភានេះ។ បន្ទាប់មក ពួកគេបានដើរដង្ហែជាជួរ ឆ្ពោះទៅមុខសាលាខេត្តបាត់ដំបង និងមុខគ្រឹះស្ថានធនាគារមួយចំនួនដែលមាននៅក្នុងខេត្តបាត់ដំបង ដោយនៅក្នុងដៃមានកាន់ទង់ជាតិកម្ពុជាផង។
លោក ហ៊ុន វណ្ណៈ តំណាងក្រុមយុវជនខ្មែរថាវរៈ បានថ្លែងថា គោលបំណងនៃការធ្វើកូដកម្មបង្អត់អាហាររបស់យុវជនខ្មែរថាវរៈនេះ គឺដើម្បីទាមទារឲ្យរដ្ឋាភិបាល និងគ្រឹះស្ថានមីក្រូហិរញ្ញវត្ថុទាំងអស់នៅកម្ពុជា ពន្យារពេលឲ្យពលរដ្ឋសងបំណុលរបស់ពួកគេ ក្នុងពេលជួបវិបត្តិនៃជំងឺកូវីដ១៩នេះ ចំនួន០៣ខែ ឬក៏លើសពីនេះ។ បើតាមលោក ហ៊ុន វណ្ណៈ កូដកម្មបង្អត់អាហារនេះ គឺជាសារបង្ហាញទៅភាគីពាក់ព័ន្ធថា នៅពេលឆាប់ៗនេះ នឹងមានពលរដ្ឋខ្មែរជាច្រើនធ្លាក់ខ្លួនក្នុងភាពក្រីក្រ ខ្វះអាហារហូបចុក នៅពេលពួកគាត់គ្មានប្រាក់ចំណូល ហើយត្រូវគេបង្ខំឲ្យសងបំណុលគ្រឹះស្ថានមីក្រូហិរញ្ញវត្ថុ។ តំណាងយុវជនរូបនេះបញ្ជាក់ថា កូដកម្មបង្អត់អាហារនៅថ្ងៃនេះ មិនមែនជាយុទ្ធនាការថ្ងៃចុងក្រោយនោះទេ ពោលគឺពួកគេនឹងបន្តធ្វើនៅថ្ងៃខាងមុខទៀត។
ទាក់ទងនឹងការទាមទាររបស់យុវជនខាងលើនេះ លោក កាំង តុងងី អ្នកនាំពាក្យសមាគមគ្រឹះស្ថានមីក្រូហិរញ្ញវត្ថុនៃកម្ពុជាបានចាត់ទុកថា ជាសិទ្ធសេរីភាពនៃការសំដែងមតិរបស់ពួកគេ។ ក៏ប៉ុន្តែ សមាគមរបស់លោកមិនអាចធ្វើតាមការទាមទារនេះបានឡើយ។ តែទោះជាយ៉ាងនេះក្តី លោក តុងងី បានធ្វើបច្ចុប្បន្នភាពចុងក្រោយថា គិតត្រឹមថ្ងៃទី ០៩ ឧសភានេះ យ៉ាងហោចណាស់មានប្រជាពលរដ្ឋដែលជាអតិថិជនរបស់គ្រឹះស្ថានមីក្រូហិរញ្ញវត្ថុប្រមាណជា១០ម៉ឺននាក់រួចមកហើយ ដែលដាក់ពាក្យស្នើសុំរៀបចំឥណទានឡើងវិញ បន្ទាប់ពីមានការណែនាំរបស់ធនាគារជាតិនៃកម្ពុជា។
គួរជំរាបជូនថា ឆ្លើយតបនឹងផលប៉ះពាល់សេដ្ឋកិច្ចដែលបណ្តាលមកពីវិបត្តិនៃជំងឺកូវីដ១៩ ធនាគារជាតិនៃកម្ពុជា ធ្លាប់បានចេញសារាចរណែនាំមួយឲ្យធនាគារឯកជន និងគ្រឹះស្ថានមីក្រូហិរញ្ញវត្ថុទាំងអស់ ត្រូវរៀបចំឥណទានឡើងវិញ ឬពន្យារពេលសងបំណុលបណ្ដោះអាសន្នចំពោះអតិថិជនដែលរងផលប៉ះពាល់ជាក់ស្ដែងពីវិបត្តិជំងឺកូវីដ-១៩ ក្នុងវិស័យចំនួន០៤ រួមមាន ទេសចរណ៍ កាត់ដេរ សំណង់ និងវិស័យដឹកជញ្ជូនជាដើម។ ប៉ុន្តែយុវជន ហ៊ុន វណ្ណៈ ចាត់ទុកថា សេចក្តីណែនាំនេះ គឺមិនទាន់គ្រប់គ្រាន់នោះទេ។ ក្រុមអង្គការសង្គមស៊ីវិល និងក្រុមយុវជន បានសង្កេតឃើញថា មានស្ថាប័នធនាគារ និងគ្រឹះស្ថានមីក្រូហិរញ្ញវត្ថុតិចតួចប៉ុណ្ណោះ ដែលបានអនុវត្តតាមសារាចរណែនាំនេះ ពោលគឺភាគច្រើននៅតែបន្តទារបំណុល ពីអតិថិជនដដែល ទោះជាពួកគេកំពុងបាត់បង់មុខរបរ ឬធ្លាក់ចុះប្រាក់ចំណូលយ៉ាងណាក្តី។
សូមបញ្ជាក់ថា ប្រជាពលរដ្ឋកម្ពុជាច្រើនជាង២លាន៥សែននាក់ កំពុងជាប់បំណុលនៅក្នុងធនាគារ ឬគ្រឹះស្ថានមីក្រូហិរញ្ញវត្ថុ ជាមួយនឹងអត្រាកម្ចីជាមធ្យម ៣៨០០ដុល្លារ ដែលជាចំនួនច្រើនជាងគេនៅលើពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ