បារាំងផ្ដល់ជំនួយជាង៤០ម៉ឺនដុល្លារដល់គម្រោងស្រាវជ្រាវជំងឺកូវីដ១៩ នៅកម្ពុជា
ប្រទេសបារាំង តាមរយៈស្ថានទូតរបស់ខ្លួនប្រចាំនៅទីក្រុងភ្នំពេញ បានផ្ដល់ជំនួយជាថវិកា ៤សែនអឺរ៉ូ ដែលមានចំនួនជាង៤០ម៉ឺនដុល្លារ ដល់គម្រោងចំនួន៣នៅកម្ពុជា ដែលស្រាវជ្រាវលើជំងឺកូវីដ១៩។ ការផ្ដល់ជំនួយនេះធ្វើឡើងនៅក្នុងជំនួបរវាងរដ្ឋមន្ត្រីក្រសួងសុខាភិបាល លោក ម៉ម ប៊ុនហេង និងលោកស្រីអេវ៉ា ង្វៀន ប៊ិញ ឯកអគ្គរដ្ឋទូតបារាំងប្រចាំកម្ពុជា នៅថ្ងៃទី៨ឧសភាម្សិលមិញ។
ចុះផ្សាយនៅថ្ងៃ៖
នៅក្នុងជំនួបនោះ លោកស្រីអេវ៉ា ង្វៀន ប៊ិញ បានលើកឡើងទៀតថា ទីភ្នាក់ងារអភិវឌ្ឍន៍បារាំង ក៏បានផ្តល់ជំនួយឥតសំណងចំនួន២លានអឺរ៉ូ ដើម្បីផ្តល់ការគាំទ្រដល់មន្ទីរពិសោធន៍នានា ក្នុងតំបន់អាស៊ីអាគ្នេយ៍ ដើម្បីប្រយុទ្ធប្រឆាំងនឹងជំងឺកូវីដ១៩ ដែរ ដែលក្នុងនោះក៏មានវិទ្យាស្ថានប៉ាស្ទ័រកម្ពុជា។ វិទ្យាស្ថានប៉ាស្ទ័រកម្ពុជាដែលមានកិច្ចសហប្រតិបត្តិការដ៏ស្អិតល្មួតជាមួយប្រទេសបារាំង។
បន្ថែមលើនេះ លោកស្រីអេវ៉ា ង្វៀន ប៊ិញ អរគុណមន្ត្រី និងស្ថាប័នពាក់ព័ន្ធទាំងអស់របស់កម្ពុជា ដែលបានយកចិត្តទុកដាក់ព្យាបាលជនជាតិបារាំង ដែលមានជំងឺកូវីដ១៩ ទាំង៤០នាក់ បានជាសះស្បើយ។ លោកស្រីក៏បានជំរុញឲ្យមានការបន្តប្រុងប្រយ័ត្នជាមួយនឹងកូវីដ១៩ បើទោះជាស្ថានភាពនៅកម្ពុជាមានភាពល្អប្រសើរក៏ដោយ។
សូមជំរាបថា មកទល់ពេលនេះ កម្ពុជាមានអ្នកផ្ទុកជំងឺកូវីដ១៩ចំនួន ១២២ ករណី ភាគច្រើន គឺជាករណីនាំចូល។ ហើយក្នុងចំណោម១២២ករណីនេះ កម្ពុជាបានព្យាបាលជាសះស្បើយចំនួន១២០ករណី និងកំពុងសម្រាកព្យាបាលចំនួន២ករណីទៀតប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ