៤ខែក្នុងឆ្នាំ២០២០នេះ កម្ពុជាផលិតអំបិលបានជាង១២ម៉ឺនតោន
នៅក្នុងរយៈពេល៤ខែក្នុងឆ្នាំ២០២០នេះ គឺចាប់ពីខែមករាដល់ខែមេសា ការផលិតអំបិលរបស់កម្ពុជាទទួលបានជាង១២ម៉ឺនតោន។ នេះបើតាមការគូសបញ្ជាក់ឱ្យដឹងរបស់តំណាងមន្ទីរឧស្សាហកម្ម វិទ្យាសាស្រ្ដ បច្ចេកវិទ្យា និងនវានុវត្ដន៍ខេត្តកំពតនៅព្រឹកថ្ងៃសុក្រនេះ។ ចំណែក សហគមន៍អ្នកផលិតអំបិលខេត្តកែប និងកំពតវិញ បានព្យាករណ៍ទុកថា បើអាកាសធាតុនៅតែអំណោយផលដូចពេលនេះ នោះកម្ពុជានឹងមិនខ្វះអំបិលប្រើប្រាស់ដូចឆ្នាំទៅទេ។
ចុះផ្សាយនៅថ្ងៃ៖
ស្តាប់ - ០១:៥៨
នៅក្នុងសន្និសីទសារព័ត៌មានស្ដីពី«វឌ្ឍនភាព និងទិសដៅការងារបន្ដរបស់រដ្ឋបាលខេត្តកំពត» នៅព្រឹកថ្ងៃសុក្រនេះ អនុប្រធានមន្ទីរឧស្សាហកម្ម វិទ្យាសាស្រ្ដ បច្ចេកវិទ្យា និងនវានុវត្ដន៍ខេត្តកំពតបានបង្ហាញឱ្យដឹងថា ៤ខែឆ្នាំនេះ ការផលិតអំបិលក្នុងខេត្តនេះទទួលបានជាង១២ម៉ឺន២ពាន់៣២តោន។ ចំពោះនៅក្នុងខែមេសា ការផលិតអំបិលមានចំនួនជាង២ម៉ឺន៧ពាន់តោន។ ដោយឡែក ចំពោះការលក់អំបិលចេញនៅក្នុងរយៈពេល៤ខែឆ្នាំនេះវិញ គឺមានចំនួនជាង១ម៉ឺន២ពាន់តោន។
ចំណែក លោកតូ លិ ដែលអភិបានរងខេត្តកំពតបានអះអាងថា រដ្ឋាភិបាលកម្ពុជាតែងតែជំរុញឱ្យបង្កើននូវការផលិតអំបិលឱ្យបានច្រើន ដើម្បីបំពេញតម្រូវការនៅក្នុងស្រុក។ ម្យ៉ាងវិញទៀត លោកក៏បានអះអាងថា អាជ្ញាធរក៏កំពុងរឹតបន្តឹងលើការនាំចូលអំបិលគីមីពីប្រទេសជិតខាងមកចែកចាយនៅលើទីផ្សារប្រទេសកម្ពុជាផងដែរ ពោល គឺជៀសវាងឱ្យបាននូវការបន្លំម៉ាកសញ្ញាដែលជាការប្រកួតប្រជែងមិនស្មើភាព។
សូមបញ្ជាក់ថា កម្ពុជាត្រូវការអំបិលប្រមាណ១០ម៉ឺនតោនសម្រាប់ប្រើប្រាស់នៅក្នុងស្រុកក្នុងមួយឆ្នាំៗ។ កាលពីឆ្នាំ២០១៩កន្លងទៅ កម្ពុជាបាននាំអំបិលចូលពីបរទេសប្រមាណ ៥ម៉ឺនតោន ដើម្បីបំពេញបន្ថែមតម្រូវការក្នុងស្រុក។ ប៉ុន្តែនៅក្នុងឆ្នាំ២០២០នេះ សហគមន៍អ្នកផលិតអំបិលខេត្តកែប និងកំពតបានមើលឃើញពីសុទុដ្ឋិនិយមចំពោះការផលិតអំបិលកើនឡើងនៅកម្ពុជា។
លោក ប៊ុន បារាំង សហប្រធានសហគមន៍អ្នកផលិតអំបិលខេត្តកែប និងកំពត ធ្លាប់បានប្រាប់វិទ្យុបារាំង RFI ថាអាកាសធាតុក្តៅខ្លាំងចាប់តាំងពីដើមរដូវមកធ្វើឲ្យកសិករផលិតអំបិលបានច្រើនគួរឱ្យកត់សម្គាល់។ លោក ប៊ុន បារាំង បានគូសបញ្ជាក់បន្ថែមទៀតថា ប្រសិនបើអាកាសធាតុអំណោយផលដូចជាឆ្នាំនេះ៣ឆ្នាំជាប់ៗគ្នា នោះ កម្ពុជានឹងមានអំបិលគ្រប់គ្រាន់ សល់អំបិល ហើយការនាំចូលអំបិលពីបរទេសមកផ្គត់ផ្គង់នឹងត្រូវបញ្ចប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ