៤ខែឆ្នាំ២០២០ កម្ពុជានាំអង្ករចេញកើនដល់កម្រិតខ្ពស់ជាងគេ ក្នុងរយៈពេល១០ឆ្នាំ
កម្ពុជាសម្រេចការនាំចេញអង្ករទៅក្រៅប្រទេសក្នុងរយៈពេល៤ខែដំបូង នៃឆ្នាំ២០២០ បានជាង៣០ម៉ឺនតោន កើនឡើងប្រមាណ៤១% ធៀបនឹងរយៈពេលដូចគ្នា កាលពីឆ្នាំ២០១៩។ នេះបើតាមសហព័ន្ធស្រូវអង្ករកម្ពុជា។ ជាមួយនឹងកំណើននៅក្នុងរយៈពេល៤ខែនេះ ការនាំចេញអង្ករនៅក្នុងត្រីមាសបន្ទាប់ ក៏ត្រូវបានព្យាករណ៍ថានឹងបន្តកើនឡើងដែរ។
ចុះផ្សាយនៅថ្ងៃ៖
ស្តាប់ - ០២:៤២
បើតាមសហព័ន្ធស្រូវអង្ករកម្ពុជា កាលពីថ្ងៃទី២ ខែឧសភា នេះគឺជាកំណើនមួយ ដែលគួរឲ្យកត់សម្គាល់បំផុតរបស់កម្ពុជា ដែលបានសម្រេចការនាំចេញ ក្នុងរយៈពេល៤ខែដើមឆ្នាំ ក្នុងតួលេខខ្ពស់បំផុតនារយៈពេល ១០ឆ្នាំចុងក្រោយនេះ។
លោក ហ៊ុន ឡាក់ ប្រធានកុ្រមប្រឹក្សាភិបាលនៃសហព័ន្ធស្រូវអង្ករកម្ពុជា បានអះអាងប្រាប់វិទ្យុបារាំងអន្តរជាតិនៅថ្ងៃទី៥ ខែឧសភានេះថា ដោយសារតែវិបត្តិកូវីដ១៩ ប្រទេសមួយចំនួនបានផ្អាកការនាំចេញ ហើយសកម្មភាពមួយចំនួននៅក្នុងពិភពលោកត្រូវផ្អាក ធ្វើឲ្យមានតម្រូវការផ្នែកស្បៀង។ ដោយឡែកកម្ពុជាមិនបានបិទការនាំចេញដែរ ដូច្នេះធ្វើឲ្យមានកំណើននៃការនាំចេញអង្ករកម្ពុជាទៅកាន់ទីផ្សារក្រៅប្រទេស។ លោកបន្ថែមថា មូលហេតុផ្សេងទៀត ដែលនាំឲ្យការនាំចេញអង្ករមានការកើនឡើង គឺតម្លៃស្រូវ និងអង្ករមានតម្លៃល្អ។
ក្នុងរយៈពេល៤ខែដើមឆ្នាំ ២០២០នេះ គឺកម្ពុជាបាននាំចេញអង្ករទៅកាន់ប្រទេសចិនចំនួន ៤១ភាគរយ ឬប្រមាណ១២ម៉ឺនតោន សហគមន៍អឺរ៉ុប និងប្រទេសអង់គ្លេស មានចំនួន៣២ភាគរយ ឬប្រមាណជិត១០ម៉ឺនតោន ប្រទេសសមាជិកអាស៊ានប្រមាណ១៣ភាគរយ ឬប្រមាណ៣៧ពាន់តោន និងបណ្តាប្រទេសផ្សេងៗទៀតមានចំនួនប្រមាណ១៤ភាគរយ ឬប្រហែល៤៣ពាន់តោន។
ដោយឡែកសម្រាប់ខែមេសា ឆ្នាំ២០២០នេះ ទោះបីជារាជរដ្ឋាភិបាលកម្ពុជា បានខិតខំយកចិត្តទុកដាក់ គិតគូរចំពោះសន្តិសុខស្បៀងសម្រាប់ប្រជាជនកម្ពុជា ដោយផ្អាកការនាំចេញអង្ករស មួយរយៈពេលខ្លីក៏ដោយ ក៏ការនាំចេញអង្ករក្រអូបរបស់កម្ពុជា សម្រេចបានជាង៦៩ពាន់តោនដែលផ្តល់នូវតម្លៃមួយយ៉ាងខ្ពស់សម្រាប់ អាជីវករ និងអ្នករកស៊ីក្នុងវិស័យស្រូវអង្ករ។ នេះបើតាមសហព័ន្ធស្រូវអង្ករកម្ពុជា។
លោក ហ៊ុន ឡាក់ ប្រធានកុ្រមប្រឹក្សាភិបាលនៃសហព័ន្ធស្រូវអង្ករកម្ពុជា ក៏បានឲ្យដឹងដែរថាដោយសារតែវិបត្តិកូវីដ១៩ មិនទាន់ថមថយនៅឡើយ ការនាំចេញអង្កររបស់កម្ពុជានឹងបន្តមានកំណើន។ លោកបញ្ជាក់ថានៅក្នុងត្រីមាសទី២ គឺចាប់ពីខែមេសា ដល់ខែមិថុនា ការបញ្ជាទិញអង្ករ នៅតែមានជាបន្តបន្ទាប់ ដែលអាចធ្វើឲ្យមានកំណើន។
បើតាមលោក ហ៊ុន ឡាក់ សម្រាប់ត្រីមាសទី៣ និងទី៤ គឺកំពុងតែស្ថិតនៅក្នុងការឃ្លាំមើលនៅឡើយ ថាតើប្រទេស ដែលមានអង្ករនាំចេញផ្សេងទៀតនឹងចាប់ផ្តើមនាំអង្កររបស់គេចេញទៅផ្សារអន្តរជាតិដែរ ឬយ៉ាងណា។ ប្រសិនបើប្រទេសគេមិននាំចេញ ដោយបញ្ហាសន្តិសុខស្បៀង នោះកម្ពុជានឹងជំរុញការនាំចេញអង្ករ ដោយសារតែកម្ពុជានៅសល់ស្រូវច្រើន តែកម្ពុជាក៏មិនភ្លេចដែរពីការធានាបាននូវសន្តិសុខស្បៀងរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ