លោក ហេង សួរ៖ រោងចក្រជាង១៣០បានដាក់ពាក្យព្យួរធ្វើឱ្យប៉ះពាល់ដល់កម្មករជិត១០ម៉ឺននាក់
គិតមកដល់ពេលនេះ មានរោងចក្រជាង១៣០រោងចក្រហើយបានដាក់ពាក្យស្នើសុំព្យូរការងារទៅកាន់ក្រសួងការងារ។ នេះបើតាមការបង្ហាញឱ្យដឹងរបស់លោកហេង សួរ អ្នកនាំពាក្យក្រសួងការងារនៅក្នុងសន្និសីទសារព័ត៌មាន ស្តីពីបច្ចុប្បន្នភាពនៃការធ្វើចត្តាឡីស័ក ចំពោះកម្មករនៅរសៀលថ្ងៃចន្ទនេះ។ បើតាមលោក ហេង សួរ រោងចក្រទាំងជាង១៣០នេះ គឺប៉ះពាល់ដល់ការងារកម្មករ កម្មការិនីប្រមាណជិត១០ម៉ឺននាក់។
ចុះផ្សាយនៅថ្ងៃ៖
ស្តាប់ - ០២:០០
ចំពោះរោងចក្រទាំងជាង១៣០នេះ អ្នកនាំពាក្យក្រសួងការងារ លោកហេង សួរបានអះអាងថា មានបំណងចង់បិទរោងចក្រទាំងស្រុងតែម្ដង ក៏ប៉ុន្តែ ដោយសារតែមានការសម្របសម្រួល និងលើកទឹកចិត្តពីសំណាល់រដ្ឋាភិបាលកម្ពុជា ទើបរោងចក្រទាំងអស់នោះមិនបិទទ្វារ ដោយត្រឹមតែព្យួរការងារវិញ។ លោកគូសបញ្ជាក់បន្ថែមថា ការព្យួរនេះ គឺផ្តល់ផលវិជ្ជមានដល់កម្មករ ពោល គឺមានន័យថា កម្មករ កម្មការិនីមិនទាន់បាត់បង់ការងារនោះទេ គឺគ្រាន់តែព្យួរមួយរយៈសិនដោយទទួលបានប្រាក់ឧបត្ថម្ភពីរដ្ឋាភិបាលកម្ពុជា និង ថៅកែរោងចក្រ។ ផ្ទុយទៅវិញ ប្រសិនបើរោងចក្របិទទ្វារ គឺកម្មករ កម្មការិនីត្រួវអត់ការងារធ្វើរយៈពេលយូរ និង គ្មានទទួលបានប្រាក់ឧបត្ថម្ភណាមួយឡើយ។
បើតាមលោកហេង សួរ ការសម្រេចព្យួរការងាររបស់រោងចក្រទាំងអស់នេះ គឺដោយសារតែជួបវិបត្តិនៃការនាំចេញ។ ការនាំចេញដែលគិតត្រឹមត្រីមាសទី១ ក្នុងឆ្នាំ២០២០នេះ បានថយចុះប្រមាណជាង៥០%។ លោកហេង សួរ បានពន្យល់ពីការថយចុះនេះថា នៅក្នុងខែមករា ដំណើរការនាំចេញមិនមានបញ្ហាអ្វីទេ ប៉ុន្តែបញ្ហាគឺនៅចង់ខែកុម្ភៈ និង ខែមីនាដែលមានបិទការធ្វើដំណើរដោយសារតែការរីករាលដាលនៃជំងឺកូវីដ-១៩។ លោកហេង សួរ បានបញ្ជាក់ថា ក្រុមហ៊ុនបញ្ជាទិញធំៗបានស្នើភាគីរោងចក្រនៅកម្ពុជាផ្អាកការដឹកទំនិញនាំចេញមួយរយៈសិន ហើយសម្រាប់ខែឧសភា និង ខែមិថុនា កម្ពុជាមិនទាន់ទទួលបានតួរលេខនៃការបញ្ជាទិញពីក្រុមហ៊ុនបញ្ជាទិញធំៗនៅឡើយទេ។
សូមកត់សម្គាល់ថា ចំពោះវិបត្តិនៃការនាំចេញនេះ កន្លងមក សមាគមរោងចក្រកាត់ដេរនៅកម្ពុជាហៅកាត់GMACបានចេញសេចក្តីអំពាវនាវជាបន្តបន្ទាប់ដល់ក្រុមបញ្ជាទិញឱ្យបន្តការបញ្ជាទិញពីកម្ពុជា។ សមាគមរោងចក្រកាត់ដេរនៅកម្ពុជាបានទទូចសុំឱ្យអ្នកបញ្ជាទិញទាំងអស់កុំបោះបង់កម្ពុជាតាមរយៈបំពេញកាតព្វកិច្ចរបស់ខ្លួនតាមកិច្ចសន្យាដែលបានចុះហត្ថលេខារួចរាល់ និង ទូទាត់ប្រាក់តាមលក្ខខណ្ឌធម្មតា។ បើតាមសមាគមរោងចក្រកាត់ដេរនៅកម្ពុជា ប្រសិនបើអ្នកបញ្ជាទិញមិនធ្វើតាមកិច្ចសន្យាទេនោះ វានឹងប៉ះពាល់ដល់ដំណើរការរោងចក្រកាត់ដេរ និងប៉ះពាល់ដល់ប្រាក់ខែរបស់កម្មករនិយោជិតផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ