កូវីដ១៩៖ ក្រសួងបញ្ចប់ការត្រួតពិនិត្យសុខភាពលើកម្មករ ក្រោយរកមិនឃើញជំងឺកូវីដ១៩
ក្រសួងការងារនិងអាជ្ញាធររាជធានីភ្នំពេញ កាលពីថ្ងៃទី ២៤ មេសា បានបញ្ចប់ការត្រួតពិនិត្យសុខភាពលើកម្មកររោងចក្រ ដែលបានឈប់សម្រាក អំឡុងពេលបុណ្យចូលឆ្នាំថ្មីនោះហើយ បន្ទាប់ពីរកមិនឃើញមានកម្មករណាម្នាក់ផ្ទុកជំងឺកូវីដ១៩នោះឡើយ។ ប៉ុន្តែមន្ត្រីសហជីពតំណាងឲ្យកម្មករបានស្នើឲ្យក្រសួងពន្យាពេល១សប្តាហ៍ទៀត។—
ចុះផ្សាយនៅថ្ងៃ៖
ស្តាប់ - ០៣:០៣
យ៉ាងហោចណាស់ មានកម្មករ-កម្មការិនី ចំនួន៥០៤៥នាក់ ដែលបានមកពិនិត្យសុខភាពក្នុងរយៈពេល០៤ថ្ងៃ ដើម្បីរកមើលពីជំងឺកូវីដ១៩ ប៉ុន្តែពុំមានកម្មករណាម្នាក់ ត្រូវបានរកឃើញថា មានផ្ទុកជំងឺកូវីដ១៩នោះឡើយ។ យោងតាមសេចក្តីប្រកាសព័ត៌មានរបស់ក្រសួងការងារ កាលពីល្ងាចថ្ងៃទី ២៤ មេសា ក្រសួងបានសម្រេចបិទបញ្ចប់ការត្រួតពិនិត្យសុខភាពលើកម្មកររោងចក្រនេះ ដែលបានឈប់សម្រាកក្នុងអំឡុងពេលបុណ្យចូលឆ្នាំថ្មី។
យោងតាមសេចក្តីប្រកាសព័ត៌មាននេះ ក្នុងចំណោមកម្មករ-កម្មការិនី ទាំង៥០៤៥នាក់ ដែលបានមកពិនិត្យសុខភាពនៅមណ្ឌលត្រួតពិនិត្យសុខភាពទាំង១០កន្លែងនៅរាជធានីភ្នំពេញនោះ កម្មករ ៤,៨២៣នាក់ ត្រូវបានដាក់ឲ្យនៅដាច់ដោយឡែករយៈពេល១៤ថ្ងៃនៅតាមផ្ទះឬបន្ទប់ជួលរៀងៗខ្លួន។ ចំណែក៩៧នាក់ ត្រូវបានដាក់ឲ្យស្នាក់នៅមណ្ឌលចត្តាឡីស័កកម្រិត១, ១២៥នាក់ ដាក់ឲ្យស្នាក់នៅមណ្ឌលចត្តាឡីស័កកម្រិត២ និងយកសំណាកទៅពិសោធបន្តចំនួន ១២៥នាក់ ហើយក្នុងចំណោមកម្មករទាំង១២៥នាក់នេះ លទ្ធផលធ្វើតេស្តអវិជ្ជមានជំងឺកូវីដ១៩។ ដោយឡែកកម្មករសរុបចំនួន២០២នាក់ ត្រូវបានអនុញ្ញាតឲ្យចេញពីមណ្ឌលចត្តាឡីស័កកម្រិត១ និងកម្រិត២ ដោយទៅធ្វើចត្តាឡីស័កបន្តនៅតាមផ្ទះរៀងៗខ្លួន។
បើយោងតាមសេចក្តីប្រកាសព័ត៌មានរបស់ក្រសួងការងារ ដោយគិតចាប់ពីយប់ថ្ងៃទី ០៩ មេសា ថ្ងៃដែលរដ្ឋាភិបាលកម្ពុជាបានដាក់កំហិតការធ្វើដំណើរក្នុងផ្ទៃប្រទេស នៅមុនពេលបុណ្យចូលឆ្នាំថ្មី រហូតដល់ថ្ងៃទី ២៤ មេសា គឺមានរយៈពេលលើសពី១៤ថ្ងៃហើយ ហើយក្នុងអំឡុងពេលនេះ ក្រសួងពុំបានរកឃើញករណីវិជ្ជមានកូវីដ១៩ថ្មីនោះឡើយ និងដោយយោងតាមលទ្ធផលអវិជ្ជមាននៃការធ្វើតេស្តសំណាកទាំង១២៥ករណីនោះ ក្រសួងបានសម្រេចបញ្ចប់ការត្រួតពិនិត្យសុខភាព ចាប់ពីវេលាម៉ោង៦ល្ងាច ថ្ងៃទី ២៤ មេសា ដោយរក្សាទុកតែមណ្ឌលចត្តាឡីស័កកម្រិត២ ក្នុងវិទ្យាល័យជម្ពូវ័ន ដើម្បីបន្តតាមដានស្ថានភាពសុខភាពរបស់កម្មករចំនួន២០នាក់តទៅទៀត រហូតដល់ស្ថានភាពសុខភាពរបស់ពួកគេ អាចទៅធ្វើចត្តាឡីស័កនៅតាមផ្ទះឬបន្ទប់ជួលរៀងៗខ្លួនបាន។
យ៉ាងណាក្តី លោក អាត់ ធន់ ប្រធានសហភាពការងារកម្ពុជា បានសំដែងការព្រួយបារម្ភថា ការបិទបញ្ចប់ការត្រួតពិនិត្យសុខភាពកម្មករដែលឈប់សម្រាកពេលបុណ្យចូលឆ្នាំនេះ នឹងធ្វើឲ្យមានបញ្ហាធំពីរ។ ទី១.ការចម្លងនៃជំងឺកូវីដ១៩នៅក្នុងសហគមន៍ ក្នុងករណីដែលកម្មករផ្ទុកជំងឺ ហើយខកខានមិនបានមកពិនិត្យសុខភាពក្នុងរយៈពេល០៤ថ្ងៃកន្លងមកនេះ និងទី២.ការបញ្ឈប់កម្មករពីការងារដោយគ្មានប្រាក់អតីតភាពការងារ ដោយសារតែពួកគេខកខានមិនបានមកពិនិត្យសុខភាពតាមការកំណត់របស់ក្រសួងការងារ។ ជាមួយនឹងក្តីបារម្ភធំៗទាំងពីរចំណុចខាងនេះ លោក អាត់ ធន់ បានស្នើឲ្យក្រសួងការងារពន្យាការត្រួតពិនិត្យសុខភាពដល់កម្មកររយៈពេល១សប្តាហ៍ទៀត។
សូមបញ្ជាក់ថា យ៉ាងហោចណាស់ មានកម្មករប្រមាណជា៣ម៉ឺននាក់នៅទូទាំងប្រទេសដែលសម្រាកក្នុងពេលបុណ្យចូលឆ្នាំថ្មី ខណៈរាជធានីភ្នំពេញមាន១ម៉ឺន៥ពាន់នាក់ តែនាក់មកពិនិត្យសុខភាព មិនដល់៣០%ផង។ ក្រសួងការងារធ្លាប់បានព្រមានថា កម្មករណាដែលមិនបានធ្វើចត្តាឡីស័ករយៈពេល១៤ថ្ងៃ នឹងប្រឈមការបញ្ឈប់ពីការងារ ដោយគ្មានការទូទាត់ប្រាក់អតីតភាពពីនិយោជកឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ