អ្នកនាំពាក្យ៖ អាជ្ញាធរភ្នំពេញត្រៀមអនុវត្តដាក់កម្មករនៅដោយឡែកក្រោយត្រឡប់ពីចូលឆ្នាំ
អ្នកនាំពាក្យសាលារាជធានីភ្នំពេញ លោកម៉េត មាសភក្តី បានថ្លែងអះអាងប្រាប់វិទ្យុបារាំងអន្តរជាតិនៅព្រឹកថ្ងៃសុក្រនេះថា អាជ្ញាធររាជធានីភ្នំពេញបានត្រៀមខ្លួនរាល់អស់ហើយក្នុងការសហការជាមួយក្រសួងការងារ និង ក្រសួងសុខាភិបាលក្នុងការរៀបចំដាក់ដាច់ដោយឡែកនូវកម្មករដែលវិលត្រឡប់មកស្រុកកំណើតរយៈពេល១៤ថ្ងៃ។ ការប្រកាសត្រៀមនេះ បន្ទាប់ពីមានព័ត៌មានថា កម្មករជាង១ម៉ឺន៥ពាន់នាក់នឹងត្រូវដាក់ឱ្យនៅដាច់ដោយឡែកក្រោយមកពីចូលឆ្នាំនៅស្រុកកំណើត។
ចុះផ្សាយនៅថ្ងៃ៖
ស្តាប់ - ០២:១០
បណ្តាញផ្សព្វផ្សាយព័ត៌មាននានានៅកម្ពុជាបានចុះផ្សាយឱ្យដឹងថា កម្មករ កម្មការិនីចំនួនជាង១ម៉ឺន៥ពាន់នាក់(១៥,៧២៦នាក់)នឹងត្រូវដាក់ឱ្យនៅដាច់ដោយឡែកពីគេរយៈពេល១៤ថ្ងៃ បន្ទាប់ពីពួកគេបានទៅលេងស្រុកកំណើតក្នុងអំឡុងបុណ្យចូលឆ្នាំប្រណៃជាតិខ្មែរដែលផ្ទុយពីបម្រាមរបស់រដ្ឋាភិបាលកម្ពុជា។ ពួកគេទាំងនេះ នឹងដាក់ឱ្យស្នាក់នៅក្នុងសាលារៀនចំនួន៣៧សាលា ដែលមានបន្ទប់ចំនួ៦៩៩បន្ទប់។ ការធ្វើបែបនេះ គឺដើម្បីការពារ និង ទប់ស្កាត់ការរីករាលដាលនៃជំងឺកូវីដ-១៩។
ជុំវិញព័ត៌មាននេះ ក្រសួងការងារ ក្រសួងសុខាភិបាល និង សមាគមរោងចក្រកាត់ដេរនៅកម្ពុជាហៅកាត់ថាGMAC មិនអាចទាក់ទងសុំការបំភ្លឺបាននោះទេនៅព្រឹកថ្ងៃសុក្រនេះ។ ចំណែក លោកម៉េត មាសភក្តី អ្នកនាំពាក្យសាលារាជធានីភ្នំពេញវិញក៏មិនអាចបញ្ជាក់បានដែរ តែលោកគ្រាន់តែអះអាងថា អាជ្ញាធរសាលារាជធានីភ្នំពេញបានត្រៀមខ្លួនរួចរាល់ហើយក្នុងការសហការ និងអនុវត្តតាមការណែនាំរបស់ក្រសួងការងារ ក៏ដូចជាក្រសួងសុខាភិបាលកម្ពុជាក្នុងការដាក់ឱ្យនៅដាច់ដោយឡែកចំពោះកម្មករ កម្មការិនីដែលវិលត្រឡប់ពីចូលឆ្នាំនៅស្រុកកំណើត។
សូមបញ្ជាក់ថា កាលពីថ្ងៃទី១៥ ខែមេសាកន្លងទៅ លោកម៉ម ប៊ុនហេង រដ្ឋមន្ត្រីក្រសួងសុខាភិបាលបានសរសេរលិខិតស្នើឱ្យរដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈចាត់វិធានការដាក់ឱ្យនៅដាច់ដោយឡែករយៈពេល១៤ថ្ងៃចំពោះកម្មករ-កម្មការិនីដែលវិលត្រឡប់ពីស្រុកកំណើតមកធ្វើការនៅរាជធានីភ្នំពេញវិញ។លោកម៉ម ប៊ុនហេង ចង់ឱ្យកម្មករ កម្មការិនីទាំងអស់នេះស្នាក់នៅកន្លែងស្នាក់នៅរបស់ខ្លួនជាចាំបាច់ ដើម្បីតាមដានសុខភាព និង ធ្វើការពិនិត្យរកជំងឺកូវីដ-១៩។
ក្រសួងការងារមិនបានឆ្លើយបែបណានោះទេ។ ក៏ប៉ុន្តែកាលពីថ្ងៃទី៩ មេសាកន្លងទៅ ក្រសួងនេះបានគូសបញ្ជាក់ថា កម្មករនិយោជិតណាម្នាក់ឈប់សម្រាកក្នុងអំឡុងបុណ្យចូលឆ្នាំថ្មីដោយឯកឯង នឹងត្រូវដាក់ក្នុងវិធានចត្តាឡីស័កសុខាភិបាលរយៈពេល១៤ថ្ងៃ មុនចូលបំពេញការងារវិញ ហើយមិនទទួលបានប្រាក់ឈ្នួលក្នុងរយៈពេលធ្វើចត្តាឡីស័កនេះឡើយ។ ប៉ុន្តែ បើសិនកម្មករនិយោជិតណាម្នាក់ឈប់សម្រាកដោយមានការអនុញ្ញាតពីនិយោជក គឺកម្មករនិយោជិតនឹងត្រូវដាក់ក្នុងវិធានចត្តាឡីស័កសុខាភិបាល មុនចូលបំពេញការងារវិញ និងទទួលបានប្រាក់ឈ្នួលពីនិយោជកក្នុងរយៈពេលធ្វើចត្តាឡីស័កនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ