អង្គការអ្នកកាសែតគ្មានព្រំដែនទាមទារឲ្យដោះលែងចាងហ្វាង TVFB
អង្គការអ្នកកាសែតគ្មានព្រំដែន Reporters Without Borders ទាមទារឲ្យអាជ្ញាធរកម្ពុជា ដោះលែងចាងហ្វាងទូរទស្សន៍អនឡាញ TVFB និងផ្ដល់អាជ្ញាប័ណ្ណឲ្យស្ថាប័ននេះវិញ។ ការទាមទារនេះ ធ្វើឡើងតាមរយៈសេចក្ដីថ្លែងការណ៍ចុះថ្ងៃទី០៨មេសា ពោលគឺតែមួយថ្ងៃប៉ុណ្ណោះក្រោយការចាប់ខ្លួនចាងហ្វាង TVFB លោក សុវណ្ណ រិទ្ធី ក្រោមបទចោទញុះញង់ឲ្យប្រព្រឹត្តបទល្មើសជាអាទិ៍ តាមមាត្រា ៤៩៥ នៃក្រមព្រហ្មទណ្ឌកម្ពុជា។
ចុះផ្សាយនៅថ្ងៃ៖
«ការចាប់អ្នកសារព័ត៌មានដាក់គុកដោយសារតែការស្រង់សម្ដីនាយករដ្ឋមន្ដ្រីមកផ្សាយទាំងដុល គឺជារឿងមិនសមហេតុផលទាល់តែសោះ»។ នេះគឺជាការលើកឡើងរបស់អង្គការអ្នកកាសែតគ្មានព្រំដែន បន្ទាប់ពីអាជ្ញាធរកម្ពុជាចាប់ខ្លួនចាងហ្វាងទូរទស្សន៍អនឡាញ TVFB លោក សុវណ្ណ រិទ្ធី ដោយចោទប្រកាន់ថា ជាការញុះញង់ឲ្យមានចលាចលនៅក្នុងសង្គម ពាក់ព័ន្ធនឹងជំងឺកូវីដ១៩។
តាមរយៈទំព័រហ្វេសប៊ុករបស់ខ្លួន លោក សុវណ្ណ រិទ្ធី បានស្រង់ប្រសាសន៍លោកនាយករដ្ឋមន្ដ្រី ហ៊ុន សែន ដែលបានថ្លែងនៅក្នុងសន្និសីទសារព័ត៌មាននាថ្ងៃទី០៧មេសាថា «បើអ្នករត់ម៉ូតូឌុបក្ស័យធន លក់ម៉ូតូចាយសិនទៅ រដ្ឋាភិបាលគ្មានលទ្ធភាពជួយនោះទេ»។ សម្រាប់អាជ្ញាធរកម្ពុជា អ្វីដែលលោកនាយករដ្ឋមន្ដ្រីលើកឡើងនេះ គឺជាការនិយាយលេង។ និងថា ប្រមុខរដ្ឋាភិបាលកម្ពុជា គ្មានចេតនាដូចការចុះផ្សាយរបស់លោក សុវណ្ណ រិទ្ធី ឡើយ។ លោក សុវណ្ណ រិទ្ធី ត្រូវបានសមត្ថកិច្ចចាប់ខ្លួននៅយប់ថ្ងៃទី០៧មេសានោះ និងត្រូវបញ្ជូនបន្តទៅកាន់តុលាការនៅថ្ងៃទី០៨មេសា។
ពាក់ព័ន្ធនឹងការចាប់ខ្លួន លោក សុវណ្ណរិទ្ធី នេះដែរ លោក ណុប វី នាយកប្រតិបត្តិនៃសមាគមសារព័ត៌មាន Cambodja បានលើកឡើងថា អាជ្ញាធរគួរតែលើកយកច្បាប់ស្តីពីរបបសារព័ត៌មានមកអនុវត្ត។ តាមលោក ណុប វី អ្នកដែលរងការខូចខាតដោយសារតែការផ្សាយរបស់លោក សុវណ្ណ រិទ្ធី គួរតែធ្វើលិខិតសុំបំភ្លឺ ដាក់ទៅនិពន្ធនិយកដើម្បីឲ្យគាត់ធ្វើការកែតម្រូវស្របទៅតាមខ្លឹមសារច្បាប់ស្តីពីរបបសារព័ត៌មាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ