លោក ហ៊ុន សែន ស្នើព្រឹទ្ធសភាកោះប្រជុំវិសមញ្ញ ដើម្បីអនុម័តសេចក្តីព្រាងច្បាប់ដាក់ប្រទេសក្នុងភាពអាសន្ន
ប្រមុខរដ្ឋាភិបាល កាលពីម្សិលមិញ បានស្នើឲ្យព្រឹទ្ធសភាកោះប្រជុំវិសមញ្ញឬជាបន្ទាន់ដើម្បីអនុម័តលើសេចក្តីព្រាងច្បាប់ដាក់ប្រទេសក្នុងភាពអាសន្ន បន្ទាប់ពីសេចក្តីព្រាងច្បាប់នេះត្រូវបានគណៈអចិន្ត្រៃយ៍នៃគណៈរដ្ឋមន្ត្រីដឹកនាំដោយលោកនាយករដ្ឋមន្ត្រី ហ៊ុន សែន ពិនិត្យរួចនៅក្នុងសប្តាហ៍នេះ។ ការដែលកម្ពុជាត្រូវការច្បាប់ថ្មីនេះជាបន្ទាន់គឺនៅគ្រាដែលកម្ពុជាកំពុងកើតមានករណីឆ្លងរាលដាលជំងឺកូវី១៩ដូចប្រទេសនានាលើពិភពលោកដែរ។
ចុះផ្សាយនៅថ្ងៃ៖
ស្តាប់ - ០២:២១
«រាជរដ្ឋាភិបាលត្រូវការជាចាំបាច់នូវច្បាប់ស្តីពី ការដាក់ប្រទេសជាតិក្នុងភាពអាសន្ន ជាការប្រញាប់ដើម្បីអនុវត្តកម្មវិធីនយោបាយរបស់ខ្លួន»។ នេះជាការគូសបញ្ជាក់នៅក្នុងលិខិតរបស់លោកនាយករដ្ឋមន្ត្រី ហ៊ុន សែន ចុះថ្ងៃទី៣មេសាដាក់ទៅកាន់លោក សាយ ឈុំ ប្រធានព្រឹទ្ធសភា។ ការដែលរដ្ឋាភិបាលស្នើឲ្យព្រឹទ្ធសភាកោះប្រជុំជាវិសមញ្ញនៅពេលនេះដោយសារតែអំឡុងពេលនេះគឺជាពេលវិស្សកាលរបស់ព្រឹទ្ធសភា។
ចំណែករដ្ឋសភាវិញ បានទទួលសេចក្តីព្រាងច្បាប់នេះរួចហើយ តែនៅមិនទាន់កំណត់ពេលកោះប្រជុំពេញអង្គរដ្ឋសភាដើម្បីអនុម័តសេចក្តីព្រាងច្បាប់នេះនៅថ្ងៃណាឡើយ។ នេះបើតាមអគ្គលេខាធិការរដ្ឋសភាលោក ឡេង ប៉េងឡុង ដែលប្រាប់វិទ្យុបារាំងនៅព្រឹកថ្ងៃទី៤មេសានេះ។
យ៉ាងណាក៏ដោយ អ្នកច្បាប់មួយចំនួនចង់ឲ្យមានការពិភាក្សាបន្ថែមទៀតលើសេចក្តីព្រាងច្បាប់នេះមុននឹងត្រូវបានអនុម័តដោយសភាទាំងពីរថ្នាក់។ លោក សុខ សំអឿន អ្នកច្បាប់ម្នាក់នៅកម្ពុជាបានលើកឡើងថា ការដាក់ពិន័យនៅក្នុងសេចក្តីព្រាងច្បាប់នេះ ហាក់ធ្ងន់ធ្ងរពេក ដោយគ្រាន់តែល្មើសចេញពីផ្ទះ ដែលត្រូវជាប់ពន្ធនាគារពី១ខែទៅ១ឆ្នាំ។ បើតាមអ្នកច្បាប់ជើងចាស់រូបនេះ ការចែងពីទោសពិន័យ គួរធ្វើឡើងដោយមិនមានកម្រិតទោសអប្បរមានោះទេ។
សូមបញ្ជាក់ថា សេចក្តីព្រាងច្បាប់ស្តីពី «ការគ្រប់គ្រងប្រទេសជាតិស្ថិតក្នុងភាពអាសន្ន» ដែលមាន៥ជំពូក និង១១មាត្រា ត្រូវបានគណៈអចិន្ត្រៃយ៍គណៈរដ្ឋមន្ត្រីកម្ពុជាដឹកនាំដោយលោកនាយករដ្ឋមន្ត្រី ហ៊ុន សែន ពិនិត្យរួចរាល់ហើយ កាលពីថ្ងៃទី ៣១ មីនា ដោយពុំចាំបាច់ឆ្លងកាត់កិច្ចប្រជុំគណៈរដ្ឋមន្ត្រីនៅថ្ងៃសុក្រសប្តាហ៍នេះទេ។
អ្វីជាការកត់សំគាល់ បើផ្អែកតាមខ្លឹមសារនៃសេចក្តីព្រាងច្បាប់នេះ នឹងដាក់ពិន័យធ្ងន់ធ្ងរដល់ជនណាដែលរារាំងកិច្ចប្រតិបត្តិការពេលប្រទេសជាតិស្ថិតក្នុងភាពអាសន្ន ដែលនាំឲ្យមានចលាចលជាសាធារណៈ ឬប៉ះពាល់ដល់សន្តិសុខជាតិ ដោយត្រូវប្រឈមជាប់ពន្ធនាគារពី៥ឆ្នាំទៅ១០ឆ្នាំ។ ចំណែកឯអ្នកដែលមិនគោរពតាមវិធានការក្នុងពេលប្រទេសស្ថិតក្នុងភាពអាសន្នវិញ ត្រូវផ្តន្ទាទោសដាក់ពន្ធនាគារពី១ខែទៅ១ឆ្នាំ និងពិន័យជាប្រាក់ពី១០ម៉ឺនរៀលដល់១លានរៀល និងដាក់ពន្ធនាគារពី១ឆ្នាំទៅ៥ឆ្នាំ និងពិន័យជាប្រាក់ពី១លានទៅ៥លានរៀល កាលបើអំពើនោះ នាំឲ្យមានចលាចលជាសាធារណៈ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ