គណៈរដ្ឋមន្ត្រីកម្ពុជានឹងប្រជុំពិភាក្សាសេចក្តីព្រាងច្បាប់ដាក់ប្រទេសក្នុងគ្រាអាសន្ន
នៅថ្ងៃសុក្រសប្តាហ៍នេះ គណៈរដ្ឋមន្ត្រីកម្ពុជាគ្រោងនឹងបើកកិច្ចប្រជុំពិភាក្សាច្បាប់ដាក់ប្រទេសក្នុងភាពអាសន្ន មុនដាក់ច្បាប់នេះឲ្យរដ្ឋសភាអនុម័តយល់ព្រម។ នេះបើតាមការលើកឡើងរបស់លោកនាយករដ្ឋមន្ត្រីហ៊ុន សែន នាព្រឹកនេះ។ ការបង្កើតច្បាប់នេះឡើង ស្របពេលដែលស្ថានភាពនៃការឆ្លងរាលដាលនៃជំងឺកូវីដ១៩ ក្នុងពិភពលោកមាននិន្នាការមិនថមថយ ហើយកម្ពុជាក៏បន្តរកឃើញអ្នកឆ្លងជំងឺនេះផងដែរ។
ចុះផ្សាយនៅថ្ងៃ៖
ស្តាប់ - ០២:០០
លោកនាយករដ្ឋមន្ត្រីហ៊ុន សែន នៅក្នុងសន្និសីទកាសែតនាព្រឹកថ្ងៃទី៣០ ខែមីនា នៅរដ្ឋសភាជាតិ បានលើកឡើងថា សេចក្តីព្រាងច្បាប់ស្តីពីការដាក់ប្រទេសក្នុងភាពអាសន្នត្រូវបានធ្វើរួចរាល់ ហើយគ្រោងនឹងយកទៅជជែកនៅអចិន្ត្រៃយ៍គណៈរដ្ឋមន្ត្រីនៅថ្ងៃទី៣១ ខែមីនា មុននឹងដាក់ចូលឲ្យគណៈរដ្ឋមន្ត្រីប្រជុំអនុម័តនៅថ្ងៃសុក្រ ទី៣ ខែមេសា ខាងមុខនេះ។
លោកនាយករដ្ឋមន្ត្រីហ៊ុន សែន ប្រាប់ពលរដ្ឋកុំឲ្យមានព្រួយបារម្ភ ហើយគិតថាកម្ពុជានឹងធ្វើការបិទប្រទេសនោះ ប៉ុន្តែកម្ពុជាចាំបាច់ត្រូវតែមានច្បាប់នេះនៅក្នុងដៃ ដើម្បីឆ្លើយតបទៅនឹងការរីករាលដាលនៃជំងឺកូវីដ១៩។ បច្ចុប្បន្នកម្ពុជាមិនទាន់មានច្បាប់ណា ដើម្បីត្រួតត្រាសភាពការណ៍ក្នុងពេលដែលត្រូវដាក់ប្រទេសក្នុងភាពអាសន្នទេ ដូច្នេះច្បាប់មួយត្រូវតែបង្កើតឡើង ដើម្បីឲ្យរដ្ឋអនុវត្តទៅដោយរលូន។
ចាប់តាំងពីឆ្នាំ១៩៩៣ រហូតមកដល់ពេលនេះ ដែលមានរយៈពេល២៧ឆ្នាំហើយ លោកនាយករដ្ឋមន្ត្រីហ៊ុន សែន អះអាងថាលោកមិន ដែលគិតដល់ការធ្វើច្បាប់បែបនេះនោះទេ ប៉ុន្តែសភាពការណ៍តម្រូវឲ្យធ្វើ ដោយយោងទៅលើការឆ្លងរាលដាលជំងឺកូវីដ១៩លើពិភពលោកមិនទាន់មានភាពធូរស្រាលនៅឡើយទេ ក្រៅពីប្រទេសចិន។
ការប្រកាសដាក់ប្រទេសក្នុងគ្រាមានអាសន្ន និងការបង្កើតច្បាប់គ្រប់គ្រងប្រទេសក្នុងគ្រាមានអាសន្ន ពុំមែនមានន័យថាត្រូវអនុវត្តនោះទេ ពោលគឺគ្រាន់តែជាមធ្យោបាយឲ្យមាននៅក្នុងដៃប៉ុណ្ណោះ នៅពេលសភាពការណ៍ត្រួតត្រាលែងបាន ដោយអំណាចរបស់សមត្ថកិច្ច នោះអាចមានការបញ្ចេញកងទ័ពក្នុងក្របខណ្ឌគ្រាមានអាសន្ន។ នេះបើតាមការលើកឡើងរបស់លោកនាយករដ្ឋមន្ត្រី ហ៊ុន សែន។
លោក បណ្ឌិត មាស នី អ្នកស្រាវជ្រាវខាងការអភិវឌ្ឍសង្គម បានលើកឡើងថា មុនដាក់ប្រទេសក្នុងភាពអាសន្នរដ្ឋាភិបាលត្រូវតែរៀបចំវិធានការ និងប្រព័ន្ធគាំទ្រមួយចំនួនសម្រាប់ប្រជាពលរដ្ឋ។ លោកបណ្ឌិត មាស នី ក៏មានការព្រួយបារម្ភដែរ ចំពោះជនឆ្លៀតឱកាសតម្លើងថ្លៃទំនិញលើទីផ្សារ ហើយរដ្ឋាភិបាលត្រូវមានវិធានការចំពោះជនទាំងនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ