វិធានការបន្ថែមករណីកូវីដ១៩៖ កាស៊ីណូទាំងអស់ត្រូវបិទ ខណៈការនាំចេញអង្ករ«ស»ត្រូវផ្អាក
ប្រមុខរដ្ឋាភិបាល លោក ហ៊ុន សែន នៅថ្ងៃចន្ទនេះបានដាក់ចេញនូវវិធានការបន្ថែមទៀតដើម្បីទប់ទល់នឹងការឆ្លងរាលដាលនៃជំងឺកូវីដ១៩នៅកម្ពុជា។ វិធានការថ្មីបន្ថែមទៀតនេះ គឺការបិទការស៊ីណូទាំងអស់ចាប់ពីថ្ងៃទី១មេសា និងផ្អាកការនាំចេញអង្ករ«ស»ដែលជាតម្រូវការប្រចាំថ្ងៃរបស់ពលរដ្ឋខ្មែរនោះ មិនឲ្យលក់ចេញទៅក្រៅប្រទេសចាប់ពីថ្ងៃទី៥ខែមេសា តែអង្ករក្រអូបនៅបន្តនាំចេញដដែល។
ចុះផ្សាយនៅថ្ងៃ៖
ស្តាប់ - ០២:១៧
ថ្លែងនៅក្នុងសន្និសិទសារព័ត៌មានក្រោយពីបញ្ចប់កិច្ចប្រជុំរដ្ឋសភាដើម្បីបោះឆ្នោតរុះរើគណៈរដ្ឋមន្ត្រីពាក់កណ្តាលអាណត្តិ លោកនាយករដ្ឋមន្ត្រី ហ៊ុន សែន បានអះអាងថា ការដែលលោកសម្រេចចិត្តឲ្យបិទកាស៊ីណូទាំងអស់ចាប់ពីថ្ងៃទី១ខែមេសាតទៅ គឺដើម្បីទុកពេលឲ្យថៅកែបើកប្រាក់ជូនបុគ្គលិក កម្មករ ដែលត្រូវព្យូរការងារ។ បទបញ្ជានេះធ្វើឡើងគាប់ជូនពេលដែលលោក សម រង្ស៊ី បានលើកឡើងតាមហ្វេសប៊ុកថា «លោក ហ៊ុន សែន ត្រូវតែបិទកាស៊ីណូជាបន្ទាន់ ទោះជាបនល្បែងស៊ីសង និងអំពើពាលាអាវ៉ាសែគ្រប់បែបយ៉ាង ផ្តល់ប្រាក់ចំណូលឲ្យថ្នាក់ដឹកនាំពុករលួយច្រើន យ៉ាងណាក៏ដោយ ពីព្រោះរដ្ឋអំណាចត្រូវតែការពារអាយុជីវិតប្រជាពលរដ្ឋ មុនអ្វីៗទាំងអស់»។ តែលោក ហ៊ុន សែន បានបដិសេធថា បទបញ្ជារបស់លោកនៅពេលនេះមិនធ្វើឡើងតាមការលើកឡើងរបស់អ្នកណាឡើយ គឺគ្រាន់តែគាប់ជូនពេលគ្នាតែប៉ុណ្ណោះ។
បើតាមក្រសួងសេដ្ឋកិច្ច កាស៊ីណូ នៅកម្ពុជាគិតត្រឹមចុងឆ្នាំ២០១៩ មានសរុប១៦៣កន្លែង ហើយកម្ពុជាអាចនឹងរកចំណូលពីវិស័យកាស៊ីណូនេះបានជាង៥៦លានដុល្លារក្នុងមួយឆ្នាំ។ ប៉ុន្តែតាមសេចក្តីជូនដំណឹងរបស់ក្រសួងសេដ្ឋកិច្ចនៅថ្ងៃទី៣០មីនានេះ គឺរដ្ឋនឹងលើកលែងការតព្វកិច្ចចំណូលប្រចាំខែចាប់ពីថ្ងៃទី១មេសារហូតដល់មានការបើកដំណើរការឡើងវិញ។
ក្រៅពីបញ្ជាឲ្យបិទកាស៊ីណូនៅកម្ពុជានេះ លោកប្រមុខរដ្ឋាភិបាលក៏បានប្រកាសផ្អាកនាំស្រូវ និងអង្ករ«ស»ចេញទៅលក់នៅក្រៅប្រទេសផងដែរ ហើយជំរុញឲ្យបង្កើនការផលិតស្រូវបន្ថែមទៀត។ការផ្អាកនាំអង្ករ«ស»ចេញគឺនឹងត្រូវអនុវត្តចាប់ពីថ្ងៃទី៥មេសាតទៅរហូតដល់មានការជូនដំណឹងជាថ្មី។ យ៉ាងណាក៏ដោយចំពោះការនាំអង្ករក្រអូបដែលមិនមែនជាតម្រូវការប្រចាំថ្ងៃរបស់ពលរដ្ឋខ្មែរគឺនៅបន្តនាំចេញបានដដែល។ នេះជាការប្រកាសរបស់ប្រមុខរដ្ឋាភិបាលនៅថ្ងៃទី៣០មីនា។
បើតាមលោក ហ៊ុន សែន ការផ្អាកនាំស្រូវ និងអង្ករចេញគឺដើម្បីរក្សាទុកផ្គត់ផ្គង់នៅក្នុងប្រទេសនៅគ្រាដែលជំងឺកូវីដ១៩បន្តរាលដាល ហើយរដ្ឋនឹងផ្តល់ទុនឲ្យម្ចាស់រោងម៉ាស៊ីនកិនប្រមូលទិញស្រូវពីប្រជាកសិករខ្មែរជំនួសឈ្មួញវៀតណាម និងថៃ ដោយមិនត្រូវទម្លាក់ថ្លៃនោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ