ADB៖សេដ្ឋកិច្ចកម្ពុជានឹងខាតបង់ជិត៤០០លានដុល្លារដោយសារកូវីដ១៩
ធនាគារអភិវឌ្ឍអាស៊ីហៅកាត់ថាADB បានព្យាករណ៍នៅពេលថ្មីៗនេះថា ដោយសារតែការផ្ទុះឡើងនៃជំងឹកូវីដ១៩នៅឆ្នាំនេះ នឹងបណ្តាលឲ្យសេដ្ឋកិច្ចកម្ពុជាខាតបង់គិតជាទឹកប្រាក់ជាង៣៩០លានដុល្លារ។ ការខាតបង់សេដ្ឋកិច្ចនៅឆ្នាំនេះមិនមែនកើតមានតែកម្ពុជាទេ គឺបណ្តាប្រទេសស្ទើទាំងអស់លើពិភពលោកសុទ្ធតែជួបនឹងវិបត្តិដូចគ្នានេះដែរដោយសារតែជំងឺកូវីដ១៩។
ចុះផ្សាយនៅថ្ងៃ៖
ទំហំខាតបង់នៃសេដ្ឋកិច្ចកម្ពុជាដោយសារតែជំងឺកូវីដ១៩នេះ នៅតូចជាងបណ្តាប្រទេសមួយចំនួនក្នុងតំបន់អាស៊ាន ខណៈដែលប្រជាជនកម្ពុជាក៏មានចំនួនតិចជាងប្រទេសមួយចំនួននោះ។
បើតាមធនាគារអភិវឌ្ឍអាស៊ីហៅកាត់ថាADB ប្រទេសថៃដែលមានប្រជាជនជិត៧០លាននាក់បាននាំមុខគេក្នុងការខាតបង់សេដ្ឋកិច្ចធ្ងន់ធ្ងររហូតដល់ជាង៥,៦០១លានដុល្លារ ដែលតាមពីក្រោយដោយប្រទេសឥណ្ឌូនេស៊ីដែលមានប្រជាជនជាង២៧៣លាននាក់នឹងខាតបង់សេដ្ឋកិច្ចទំហំ២,២៦៣លានដុល្លារ។
ចំណែកប្រទេសសិង្ហបុរីមានប្រជាជនជិត៦លាននាក់និងវៀតណាមមានប្រជាជនជាង៩៧លាននាក់នឹងត្រូវខាតបង់ទំហំសេដ្ឋកិច្ចជាង១ពាន់លានដុល្លារដូចគ្នា ខណៈម៉ាឡេស៊ីមានប្រជាជនជាង៣២លាននាក់នឹងខាតបង់ប្រមាណ៨៣០លានដុល្លារដោយសារតែជំងឺកូវីដ១៩។ រីឯប្រទេសឡាវដែលមានប្រជាជនជាង៧លាននាក់នឹងខាតបង់សេដ្ឋកិច្ចតែជិត៤០លានដុល្លារ ខណៈប្រទេសប៊្រុយណេដែលមានប្រជាជនតែជាង៤សែននាក់នឹងខាតបង់ប្រមាណ២៨លានដុល្លារដោយសារតែជំងឺកូវីដ១៩។
សម្រាប់កម្ពុជាដែលមានប្រជាជនជាង១៦លាននាក់ ផលវិបាកនៃជំងឺកូវីដ១៩នេះនឹងបំផ្លាញសេដ្ឋកិច្ចកម្ពុជាជាង៣៩០លានដុល្លារ ខណៈប្រមុខរដ្ឋាភិបាលបានអះអាងថាកម្ពុជាត្រូវត្រៀមថវិកាបម្រុងពី៨០០ទៅ២០០០លានដុល្លារដើម្បីឆ្លើយតបនឹងវិបត្តិជំងឺកូវីដ១៩។
យោងតាមមូលនិធិរូបិយវត្ថុអន្តរជាតិ IMF កាលពីថ្ងៃទី ២៣ មីនា ជំងឺកូវីដ១៩នេះ នឹងបំផ្លាញសេដ្ឋកិច្ចសកលលោកនៅឆ្នាំ២០២០ ធ្ងន់ធ្ងរជាងវិបត្តិហិរញ្ញវត្ថុសកលកាលពីឆ្នាំ២០០៨-២០០៩ ទៅទៀត។ ប៉ុន្ដែ IMF រំពឹងថា សេដ្ឋកិច្ចពិភពលោក អាចនឹងងើបឡើងវិញនៅក្នុងឆ្នាំ២០២១ លុះត្រាតែ ប្រទេសនានា ត្រូវផ្ដល់អាទិភាពដល់ការគ្រប់គ្រង និងពង្រឹងប្រព័ន្ធសុខាភិបាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ