លោក ហ៊ុន សែន បង្កើតគណៈកម្មការជាតិដឹកនាំការប្រយុទ្ធកូវីដ១៩
គណៈកម្មការជាតិប្រយុទ្ធនឹងកូវីដ១៩ ត្រូវបានបង្កើតឡើងភ្លាមនៅថ្ងៃនេះ ដោយក្នុងនោះលោកនាយករដ្ឋមន្ត្រី ហ៊ុន សែន ធ្វើជាប្រធានគណៈកម្មការថ្មីនេះ។ គណៈកម្មការនេះអមដោយអនុគណៈកម្មការ៥រូបទដែលជាឧបនាយករដ្ឋមន្ត្រី និងមានការចូលរួមពីរដ្ឋមន្ត្រីនៃក្រសួងដទៃទៀតសរុបប្រមាណជា៤០រូប។ តើគណៈកម្មការជាតិប្រយុទ្ធនឹងកូវីដ១៩ មានភារៈកិច្ចអ្វីខ្លះ?
ចុះផ្សាយនៅថ្ងៃ៖
កំណត់គោលនយោបាយ និងយុទ្ធសាស្ត្រជាតិ ពាក់ព័ន្ធការប្រយុទ្ធ នឹងជំងឺកូវីដ១៩ ,ដឹកនាំផែនការយុទ្ធសាស្ត្រ ក្នុងការបង្ការ ការពារ ទប់ស្កាត់ និងគ្រប់គ្រងជំងឺកូវីដ១៩ ,គ្រប់គ្រងផលប៉ះពាល់លើទិដ្ឋភាពនយោបាយ សេដ្ឋកិច្ច សង្គមទាំងកម្រិតជាតិនិងអន្តរជាតិ ,ដឹកនាំសម្របសម្រួលការអនុវត្តវិធានការជាអន្តរវិស័យ អន្តរស្ថាប័ន ទាំងនៅរដ្ឋបាលថ្នាក់ជាតិ និងរដ្ឋបាលថ្នាក់ក្រោមជាតិ។ ទាំងនេះគឺជាការភារៈកិច្ចរបស់គណៈកម្មការជាតិប្រយុទ្ធនឹងកូវីដ១៩ដឹកនាំដោយ លោក ហ៊ុន សែន។
ការងារបន្ទាប់ គណៈកម្មការជាតិប្រយុទ្ធនឹងកូវីដ១៩ អាចអញ្ជើញរដ្ឋមន្ត្រី រដ្ឋលេខាធិការ ថ្នាក់ដឹកនាំ និងមន្ត្រីបច្ចេកទេសពាក់ព័ន្ធផ្សេងទៀត ចូលរួមប្រជុំ ឬអាចផ្ដល់ការណែនាំឲ្យអនុវត្តវិធានការណ៍បន្ទាន់នានា ដែលចាំបាច់។
ចំពោះការងារនៅថ្នាក់ក្រោមជាតិវិញ! គណៈកម្មការថ្មីនេះផ្ដល់សិទ្ធិទៅអភិបាលរាជធានីខេត្ត ដឹកនាំប្រតិបត្តិការ ក្នុងការបង្ការ ការពារ ទប់ស្កាត់ ដើម្បីគ្រប់គ្រងកូវីដ១៩នៅក្នុងដែនសមត្ថកិច្ចនៃខេត្តនីមួយៗ។
គណៈកម្មការជាតិថ្មីនេះ ក៏មានក្រុមការងារដោយឡែកមួយទៀតសម្រាប់គ្រប់គ្រងឧប្បត្តិហេតុដែលអាចបណ្ដាលមកពីជំងឺកូវីដ១៩រួមនឹងបង្កើនសមត្ថភាពក្រុមឆ្លើយតបបន្ទាន់ដើម្បីវាយបកទៅគ្រប់ព័ត៌មានក្លែងក្លាយ និងព័ត៌មានប្រឌិតអំពីជំងឺកូវីដ១៩។
សូមជម្រាបជូនថា ភារៈកិច្ចដែលបានកំណត់នៅក្នុងគណៈកម្មការថ្មីនេះ នឹងត្រូវអស់សុពលភាពនៅពេលដែលការប្រយុទ្ធនឹងជំងឺកូវីដ១៩ ត្រូវបានបញ្ចប់ជាស្ថាពរ។
អ្វីជាការកត់សម្គាល់ គណៈកម្មការជាតិបង្កើតឡើង ស្របពេលនឹងការរកឃើញចំនួនអ្នកឆ្លងកើនឡើងជាបន្តបន្ទាប់ ហើយក៏ស្របពេលមានការព្យាករណ៍ទុកជាមុនថា កូវីដ១៩អាចមានលទ្ធភាពរីករាលដាលនៅក្នុងសហគមន៍ ជាពិសេសនៅក្នុងរង្វង់គ្រួសារដែលមានសមាជិកផ្ទុកកូវីដ១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ