កម្ពុជារកឃើញថា បុរសនិងស្ត្រីជនជាតិអង់គ្លេសពីរនាក់ទៀត មានឆ្លងជំងឺកូវីដ១៩
កម្ពុជាបានរកឃើញថា បុរសនិងស្ត្រីជនជាតិអង់គ្លេសពីរនាក់ទៀតនៅលើនាវា Viking Cruise Journey មានផ្ទុកជំងឺកូវីដ១៩។ ការបញ្ជាក់នេះ គឺបន្ទាប់ពីលទ្ធផលធ្វើតេស្តដោយវិទ្យាស្ថានប៉ាស្ទ័រកម្ពុជាកាលពីយប់មិញនេះ។ បច្ចុប្បន្ន បុរសនិងស្ត្រីជនជាតិអង់គ្លេសទាំងពីរនាក់ ត្រូវបានដាក់ឲ្យនៅក្នុងបន្ទប់ដាច់ដោយឡែកនៅមន្ទីរពេទ្យបង្អែកខេត្តកំពង់ចាម ដើម្បីទទួលការព្យាបាល ខណៈអ្នកដំណើរនិងបុគ្គលិកលើនាវាចំនួន៦១នាក់ទៀត ដែលលទ្ធផលតេស្តអវិជ្ជមាន ត្រូវយកមកដាក់ដោយឡែកនៅលើគោក ដើម្បីបន្តតាមដានសុខភាព។
ចុះផ្សាយនៅថ្ងៃ៖
ស្តាប់ - ០២:៣៥
បុរសនិងស្ត្រីជនជាតិអង់គ្លេសដែលរកឃើញថា មានផ្ទុកជំងឺកូវីដ១៩នេះ គឺជាបុរសជនជាតិអង់គ្លេសវ័យ៧៣ឆ្នាំ និងស្រ្តីជនជាតិអង់គ្លេសវ័យ៦៩ឆ្នាំ។ អ្នកទាំងពីរ គឺជាប្តីប្រពន្ធនឹងគ្នា និងដែលគេដឹងថា គឺជាអ្នកដែលមានទំនាក់ទំនងជិតស្និទជាមួយស្ត្រីជនជាតិអង់គ្លេសវ័យ៦៥ឆ្នាំ ដែលកម្ពុជាបានបញ្ជាក់កាលពីថ្ងៃទី ០៧ មីនាថា មានផ្ទុកជំងឺកូវីដ១៩នៅលើនាវា Viking Cruise Journey។
យោងតាមសេចក្តីប្រកាសព័ត៌មានរបស់ក្រសួងសុខាភិបាលកម្ពុជានៅរសៀលថ្ងៃទី ១២ មីនា ការរកឃើញនេះ គឺក្រោយពីលទ្ធផលធ្វើតេស្តរកកូវីដ១៩ លើអ្នកដំណើរនិងបុគ្គលិកបំរើការងារលើនាវា Viking Cruise Journey ចំនួន៥៩នាក់ កាលពីយប់ថ្ងៃទី ១១ មីនា ដោយបង្ហាញថា វិជ្ជមានលើបុរសជនជាតិអង់គ្លេសវ័យ៧៣ឆ្នាំជាស្វាមី និងស្ត្រីជនជាតិអង់គ្លេសវ័យ៦៩ឆ្នាំ ដែលជាភរិយា។ ជាសរុបមក អ្នកដំណើរជាជនជាតិអង់គ្លេស មានវិជ្ជមានកូរ៉ូណាវីរុស គឺមានចំនួន៣នាក់ ក្នុងចំណោមអ្នកដំណើរ និងអ្នកបម្រើការនៅលើនាវាទាំងអស់ចំនួន៦៤នាក់។ នេះបើយោងតាមសេចក្តីប្រកាសព័ត៌មានរបស់ក្រសួងសុខាភិបាលកម្ពុជានៅរសៀលថ្ងៃទី ១២ មីនានេះ។
គួរជំរាបជូនថា នេះគឺជាការរកឃើញករណីឆ្លងជំងឺកូវីដ១៩ ទី៤និងទី៥ នៅក្នុងប្រទេសកម្ពុជា បន្ទាប់ពីការមកដល់នៃនាវា Viking Cruise Journey ពីប្រទេសវៀតណាម កាលពីថ្ងៃទី ០៧ មីនា។ ករណីទី១បានកើតឡើងទៅលើបុរសជនជាតិចិន កាលពីអំឡុងខែកុម្ភៈ នៅក្នុងខេត្តព្រះសីហនុ។ ករណីទី២ បានកើតឡើងលើបុរសជនជាតិខ្មែរអាយុ៣៨ឆ្នាំ រស់នៅខេត្តសៀមរាប ករណីទី៣រកឃើញលើស្ត្រីជនជាតិអង់គ្លេសវ័យ៦៥ឆ្នាំដែលជិះនៅលើនាវា Viking Cruise Journey និងករណីទី៤និងទី៥នេះ បានរកឃើញលើបុរសនិងស្ត្រីជនជាតិអង់គ្លេសពីរនាក់ប្តីប្រពន្ធនេះ ដែលគេដឹងថា បានឆ្លងមកពីស្ត្រីជនជាតិអង់គ្លេសខាងលើ។ យោងតាមសេចក្តីប្រកាសព័ត៌មានរបស់ក្រសួងសុខាភិបាលកម្ពុជា បច្ចុប្បន្ន បុរសនិងស្ត្រីជនជាតិអង់គ្លេសទាំងពីរនាក់ ត្រូវបានដាក់ឲ្យនៅក្នុងបន្ទប់ដាច់ដោយឡែកនៅមន្ទីរពេទ្យបង្អែកខេត្តកំពង់ចាមដើម្បីទទួលការព្យាបាល ខណៈអ្នកដំណើរនិងបុគ្គលិកលើនាវាចំនួន៦១នាក់ទៀត ដែលលទ្ធផលតេស្តអវិជ្ជមាន ត្រូវយកមកដាក់ដោយឡែកនៅលើគោក ដើម្បីបន្តតាមដានសុខភាពក្នុងរយៈពេល១៤ថ្ងៃ។
សូមបញ្ជាក់ដែរថា ក្នុងចំណោមអ្នកដំណើរនិងបុគ្គលិកសរុបទាំង៦៤នាក់នៅលើនាវា Viking Cruise Journey នេះ រួមមាន ស្ត្រីចំនួន២៣នាក់ និងបុរស៤១នាក់ ដែលរួមមានចំនួន៧សញ្ជាតិ គឺសហរដ្ឋអាមេរិកចំនួន១៤នាក់ អង់គ្លេស១១នាក់ កាណាដា៤នាក់ ហូឡង់១នាក់ ភូមា១នាក់ វៀតណាម៧នាក់ និងកម្ពុជាចំនួន២៤នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ