ពិភពលោកមិនស្ថិតលើផ្លូវ គូសវាសក្នុងកិច្ចព្រមព្រៀងអាកាសធាតុក្រុងប៉ារីស
ពាក្យសន្យាទាំងឡាយ ដែលពិភពលោកចុះជាកិច្ចព្រមព្រៀងអាកាសធាតុក្រុងប៉ារីស ឆ្នាំ២០១៥ មិនអាចទប់ស្កាត់ការឡើងកម្តៅនៃភពផែនដី ឱ្យឡើងត្រឹមក្រោម ២អង្សារ នៅចុងសតវត្សរ៍ បានទេ ! នេះបើតាមការព្រមានរបស់លេខាសន្ធិសញ្ញាអង្គការសហប្រជាជាតិទទួលបន្ទុកបញ្ហាអាកាសធាតុ លោកស្រីប៉ាទ្រីស្យ៉ា អេស្ពីណូហ្សា Patricia Espinosa។
ចុះផ្សាយនៅថ្ងៃ៖ កែប្រែថ្ងៃទី៖
នៅក្នុងកិច្ចព្រមព្រៀងអាកាសធាតុ អនុម័តកាលពីឆ្នាំ២០១៥ ក្នុងឱកាសសន្និសីទអន្តរជាតិCOP២១ ពិភពលោកបានកំណត់កម្មវត្ថុទប់ស្កាត់ការឡើងកម្តៅនៃភពផែនដីនៅឆ្នាំ២១០០ ឱ្យក្រោម២អង្សារ បើប្រៀបទៅនឹងកម្តៅអាកាសធាតុមុនសម័យឧស្សាហកម្ម។ បើតាមពាក្យប្តេជ្ញាចិត្ត ពិភពលោកចង់បង្កើនកិច្ចខិតខំប្រឹងប្រែង កំរិតការឡើងកម្តៅនៃផែនដី ត្រឹម១,៥អង្សារ។ ព្រោះជាកំរិតដ៏ចាំបាច់ សម្រាប់បណ្តាប្រទេសនិងកោះជាច្រើន ដើម្បីគេចរួចពីគ្រោះមហន្តរាយធ្ងន់ធ្ងរផង និងការលិចបាត់ផង។
ប៉ុន្តែជាមួយពាក្យសន្យាដែលបានកំណត់ក្នុងដំណាក់កាលនេះ ពិភពលោកពិតជាមិនអាចសម្រេចកម្មវត្ថុដូចបំណងឡើយ ! យើងកំពុងដើរខុសផ្លូវហើយ ! នេះបើតាមការគូសបញ្ជាក់របស់លោកស្រី Patricia Espinosa។
ថ្លែងមុនបើកជំនួបចរចាស្តីអំពីអាកាសធាតុ នៅទីក្រុងបាងកក ពីថ្ងៃទី ៤-៩កញ្ញា លោកស្រីលេខាសន្ធិសញ្ញាគោលរបស់អង្គការសហប្រជាជាតិស្តីអំពីការផ្លាស់ប្តូរអាកាសធាតុ យល់ថា ភាពក្តៅហួតហែងខ្លាំង នៅអឺរ៉ុប នារដូវក្តៅឆ្នាំនេះ ឬគ្រោះភ្លើងឆេះព្រៃនៅអូស្ត្រាលី អាមេរិក ...ជាឧទាហរណ៍ជាក់ស្តែង សម្រាប់ពិភពលោក ក្នុងការផ្តល់សន្ទុះថ្មី ដល់ការប្រយុទ្ធប្រឆាំងរួម នឹងប្តូរផ្លាស់អាកាសធាតុ។ ការផ្លាស់ប្តូរអាកាសធាតុជះឥទ្ធិពលប៉ះពាល់ខ្លាំង ដល់ជីវិតប្រចាំថ្ងៃរបស់មនុស្សលោក ដែលទាមទារឱ្យគ្រប់គ្នាត្រូវបញ្ចេញសកម្មភាពជាបន្ទាន់និងដោយគ្មានបង្អង់។
សូមបញ្ជាក់ថា ជំនួបពិភាក្សានៅទីក្រុងបាងកក នឹងប្រព្រឹត្តទៅក្នុងក្របខ័ណ្ឌនៃត្រៀមរៀបចំសន្និសីទអន្តរជាតិស្តីអំពីអាកាសធាតុលើកទី ២៤ ឬCOP២៤ នៅប្រទេសប៉ូឡូញ នាខែធ្នូខាងមុខ ជាមួយនឹងកម្មវត្ថុសម្រេចឱ្យបានការកំណត់វិធាននៃការអនុវត្តកិច្ចព្រមព្រៀងអាកាសធាតុក្រុងប៉ារីស។ លោកស្រីសង្ឃឹមថាជំនួបប្រជុំនៅប្រទេសថៃនេះ នឹងភាពជឿនលឿនខ្លាំង និងសម្រេចគម្រោងវិធានដ៏រឹងម៉ាំបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ