ប្រធានាធិបតីតៃវ៉ាន់៖ គេមិនអាចលុបបំបាត់ចោលតៃវ៉ាន់នោះទេ
នៅមុនឡើងយន្តហោះ សំដៅទីក្រុងLos Angeles ប្រទេសអាមេរិក ប្រធានាធិបតីតៃវ៉ាន់ លោកស្រី ឆៃ អ៊ីងវិន បានបញ្ជាក់ជំហរដាច់ខាត ការពារប្រយោជន៍របស់តៃវ៉ាន់ នៅក្នុងឆាកអន្តរជាតិ។ សម្រាប់លោកស្រី គេមិនអាចលុបចោល កោះប្រជាធិបតេយ្យ ដែលចិនចាត់ទុករហូតមកជាខេត្ត ផ្នែកមួយ នៃប្រទេសចិនដីគោកនោះទេ។ លោកស្រីប្រធានាធិបតីតៃវ៉ាន់ ត្រូវធ្វើដំណើរចុះចតមួយថ្ងៃ នៅទឹកដីអាមេរិក មុននឹងធ្វើដំណើរបន្តទៅ ប្រទេស ប៉ារ៉ាហ្កាយ ហើយនិងបេល៊ីស នៅអាមេរិកខាងត្បូង។ នៅចុងខែកក្កដា កន្លងទៅ ទីក្រុងប៉េកាំងបានទាមទាររួចហើយ ឲ្យអាមេរិក បដិសេធ មិនឲ្យយន្តហោះដឹកប្រធានាធិបតីតៃវ៉ាន់ ចុះចត ក្នុងទឹកដីអាមេរិក។ ប៉ុន្តែ អាមេរិកមិនបានលឺធ្វើតាមការទាមទាររបស់ចិននោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៦
“នៅពេលខ្ញុំធ្វើដំណើរទៅបរទេស ពិភពលោកទាំងមូលអាចមើលឃើញ ស្គាល់តៃវ៉ាន់ និងឃើញជំហររបស់តៃវ៉ាន់ ដែលគាំទ្រសេរីភាព និងលទ្ធិប្រជាធិបតេយ្យ”។ នេះជាប្រសាសន៍របស់លោកស្រីប្រធានាធិបតីតៃវ៉ាន់ ឆៃ អ៊ីងវិន នៅមុនពេលលោកស្រី ឡើងយន្តហោះ សំដៅទឹកដីអាមេរិក។ ប្រមុខរដ្ឋាភិបាលតៃវ៉ាន់នៅបានបញ្ជាក់ថា តៃវ៉ាន់ ត្រូវមោះមុត និងដាច់ខាត ដើម្បី កុំឲ្យអ្នកណាម្នាក់អាចលុបបំបាត់ចោលវត្តមានកោះតៃវ៉ាន់។
នៅមួយរយៈចុងក្រោយនេះ ទីក្រុងប៉េកាំង បានបង្កើនយុទ្ធនាការជាច្រើន ដើម្បីបញ្ជាក់ជាម្ចាស់កម្មសិទ្ធិលើកោះតៃវ៉ាន់ ដូចជា បានបញ្ជាឲ្យក្រុមហ៊ុនបរទេស ទទួលស្គាល់តៃវ៉ាន់ ជាខេត្តមួយរបស់ចិន។
ជាក់ស្តែង ចាប់តាំងពីថ្ងៃទី២៥កក្កដាមក កោះតៃវ៉ាន់ លែងត្រូវបានទទួលស្គាល់ ជាដែនដីមួយឯករាជ្យទៀតហើយ សម្រាប់ក្រុមហ៊ុនអាកាសចរណ៍អន្តរជាតិ មួយចំនួន។ នៅលើគេហទំព័រអ៊ីនធើនែត របស់ក្រុមហ៊ុនអាកាសចរចណ៍ទាំងនោះ គឺគេមិនអាចស្វែងរកទីក្រុងតៃប៉ិះ នៅកោះតៃវ៉ាន់ ដើម្បីកំណត់ជាគោលដៅនៃការធ្វើដំណើរបានទៀតឡើយ។ ចាប់ពីពេលនេះទៅ ដែនដីតៃវ៉ាន់ ត្រូវភ្ជាប់ជាមួយនឹងពាក្យថា ប្រទេសចិន នៅពីខាងក្រោយ « Taiwan, China »
ប្រទេសចិន ដែលវាយតម្លៃថា លោកស្រីប្រធានាធិបតីតៃវ៉ាន់ មានគោលដៅ ចង់ទាមទារឯករាជ្យឲ្យកោះតៃវ៉ាន់ បានទាមទារឲ្យអាមេរិកលុបចោល ដំណើរចុះចតរបស់យន្តហោះដឹកប្រធានាធិបតីតៃវ៉ាន់ នៅទឹកដីអាមេរិក។
សូមអាន៖ តំណាងជាន់ខ្ពស់ក្រសួងការបរទេសអាមេរិកទៅតៃវ៉ាន់ ដើម្បីបើកសម្ពោធ “វិទ្យាស្ថាន”
ដូចរាល់ឆ្នាំ អាមេរិក ទំនងនឹងមិនធ្វើតាមការទាមទាររបស់ចិននោះទេ។ សហរដ្ឋអាមេរិក ចាប់តាំងពីឆ្នាំ១៩៧៩មក បានទទួលស្គាល់នយោបាយចិនមួយនេះដែរ ក៏ប៉ុន្តែ ក្នុងពេលជាមួយគ្នា បន្តរក្សាទំនាក់ទំនងពិសេសជាមួយកោះតៃវ៉ាន់ ជាពិសេស សភាអាមេរិកបានបង្កើតច្បាប់មួយ ដាក់កាតព្វកិច្ចឲ្យរដ្ឋាភិបាលផ្គត់ផ្គង់គ្រឿងសព្វាវុធទៅឲ្យតៃវ៉ាន់។
លោកស្រី ឆៃ អ៊ីងវិន ត្រូវចុះចតមួយថ្ងៃនៅអាមេរិក មុននឹងផ្តើមដំណើរទស្សនកិច្ច នៅ ប៉ារ៉ាហ្កាយ និងបេលី នៅតំបន់អាមេរិកខាងត្បូង ចាប់ពីថ្ងៃទី ១២ ដល់ថ្ងៃទី ២០សីហា។ នៅមុនត្រលប់ចូលតៃវ៉ាន់ លោកស្រីនឹងចុះចត ដូចទម្លាប់រាល់ឆ្នាំ នៅទីក្រុងHouston របស់អាមេរិក ដើម្បី ជួបពិភាក្សា ជាមួយសហគ្រិនតៃវ៉ាន់នៅអាមេរិក នៅក្រោយពេលលោកស្រីជួបប្រធានគណៈកម្មការកិច្ចការបរទេសនៅសភាអាមេរិក។ នៅថ្ងៃសៅរ៍ម្សិលមិញ ក្រុមហ៊ុនចម្រាញ់ប្រេង របស់តៃវ៉ាន់ ទើបតែបានចុះកិច្ចព្រមព្រៀង ទិញឧស្ម័នរបស់អាមេរិកតម្លៃ ២៥ពាន់លានដុល្លារ សម្រាប់ផ្គត់ផ្គង់ថាមពលរបស់តៃវ៉ាន់ ក្នុងរយៈពេល ២៥ឆ្នាំខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ