អង្គការAmnesty និង HRW ដៀលយុទ្ធសាស្ត្រឃុំជនភៀសខ្លួនរបស់អូស្ត្រាលី
អូស្ត្រាលីបានជ្រើសរើស ការបិទភ្នែកធ្វើមិនឃើញការរំលោភបំពានលើជនអន្តោប្រវេសន៍ ដោយបញ្ជូនទៅដាក់ឃុំនៅលើកោះតូចៗកណ្តាលមហាសមុទ្ទទេ។ ព្រោះជាយុទ្ធសាស្ត្រនយោបាយមួយ ដែលអូស្ត្រាលីយល់ថា អាចបំបាក់ទឹកចិត្ត ជនភៀសខ្លួនទាំងឡាយផ្សេងទៀត កុំឱ្យមានចំណង់និងសេចក្តីក្លាហានរត់ឆ្លងសមុទ្ទមកជ្រកកោនលើទឹកដីអូស្ត្រាលីទៀត។ នេះបើតាមរបាយការណ៍របស់អង្គការការពារសិទ្ធិមនុស្ស Amnesty International និង Human Right Watch ចេញផ្សាយនៅថ្ងៃពុធ ទី៣ សីហា ២០១៦។
ចុះផ្សាយនៅថ្ងៃ៖ កែប្រែថ្ងៃទី៖
អង្គការការពារសិទ្ធិមនុស្ស តែងធ្វើការរិះគន់ ជាញឹកញយ អូស្ត្រាលី ដែលមាននយោបាយតឹងតែងបំផុតប្រឆាំងនឹងជនភៀសខ្លួនសុំសិទ្ធិជ្រកកោន។ នាវាយោធា តែងចាប់បញ្ជូន ជាស្វ័យប្រវត្តិរាល់ទូកដឹកអន្តោប្រវេសន៍ណាដែលមកតោងឆ្នេរអូស្ត្រាលី ទៅកោះម៉ានុស នៅប៉ាពូអាស៊ីណូវែហ្គីណេ ឬទៅកោះណូរូ កណ្តាលមហាសមុទ្ទប៉ាស៊ីហ្វិក ឬកោះគ្រិស្មាក់ កណ្តាលមហាសមុទ្ទឥណ្ឌា ក្នុងពេលសិក្សាពាក្យសុំសិទ្ធិជ្រកកោន។ ហើយបើទោះបីសំណើសុំសិទ្ធិជ្រកកោននយោបាយ មានលក្ខណៈស្របច្បាប់ក្តី ក៏ជនភៀសខ្លួននោះមិនអាចមកជាន់ទឹកដីអូស្ត្រាលីបានដែរ។
អ្នកស្រាវជ្រាវរបស់អង្គការAmnesty International ម្នាក់ និងអង្គការ Human Rigth Watch ម្នាក់ បានធ្វើដំណើរទៅកោះណូរូ កាលពីខែកក្កដា និងបានលួចសម្ភាសន៍ដោយសម្ងាត់ជនអន្តោប្រវេសន៍ក្នុងជំរំដែលប្រៀបបានទៅនឹងគុក ដល់ទៅ៨៤នាក់។ បើតាមរបាយការណ៍របស់អ្នកស្រាវជ្រាវទាំងពីររូបនេះ នយោបាយបណ្តេញអ្នកសុំសិទ្ធិជ្រកកោនមកតាមទូករបស់អូស្រ្តាលីមានលក្ខណៈឃោរឃៅ និងជ្រុលនិយមខ្លាំងណាស់។
ទង្វើមិនអើពើ មិនដោះស្រាយព្រលែងជនភៀសខ្លួនរបស់រដ្ឋាភិបាល ដែលចង់បំបាក់ទឹកចិត្តអន្តោប្រវេសន៍ទំនងជានយោបាយដ៏លីលារបស់អង់ការ៉ា។ នេះជាអ្វីដែលមានសរសេរក្នុងរបាយការណ៍ដដែល។
ក្រុមគ្រូពេទ្យ មេធាវី អង្គការការពារសិទ្ធិមនុស្សជាច្រើនផ្សេងទៀត ធ្លាប់បានបរិហារជាញយដងមកហើយ ប្រព័ន្ធនិរទេសមនុស្ស ក្នុងអតីតកាល ទាំងហ្វូងទៅឃុំឃាំង រស់គ្មានទំនាក់ទំនងនឹងពិភពលោកខាងក្រៅ។
មានរបាយការណ៍មិនតិចទេ ដែលបានសរសេរបញ្ជាក់អំពីការរំលោភបំពាន ប្រើអំពើហិង្សាលើរាងកាយ និងផ្លូវចិត្ត ក្នុងជំរំជនភៀសខ្លួន ដែលធ្វើឱ្យពួកគេមានបញ្ហាខួរក្បាលរស់ក្នុងភាពងងឹតងងុល និងទ័លច្រក។ កម្មវត្ថុនៃជំរំណូរូ គឺរុញច្រានជនភៀសខ្លួនទាំងចាស់ទាំងក្មេង ឱ្យលែងចង់រស់នៅអូស្តា្រលី។ តួលេខផ្លូវការត្រឹមថ្ងៃទី៣០មិថុនា ២០១៦ មានអ្នកសុំសិទ្ធិជ្រកកោន៤៤២នាក់ ជាប់ឃុំនៅណូរូ និង៩៥៤នាក់នៅកោះម៉ានុស។
តែរដ្ឋាភិបាលអូស្រ្តាលីបានច្រានចោលទាំងស្រុង ការចោទកាន់របស់អង្គការការពារសិទ្ធិមនុស្សទាំងពីរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ