លោកដូណាល់ ត្រាំទទួលប្រធានាធិបតីអេហ្ស៊ីបក្រោមសំឡេងរិះគន់របស់អង្គការការពារសិទ្ធិមនុស្ស
លោកប្រធានាធិបតីអាមេរិក ដូណាល់ ត្រាំ នឹងទទួលនៅថ្ងៃចន្ទនេះ ប្រធានាធិបតីអេហ្ស៊ីប លោកអាប់ឌែល ហ្វាតា អាល់ ស៊ីស៊ី។ នេះជាលើកទី១ ដែលសេតវិមានទទួលប្រមុខដឹកនាំស៊ីស៊ី ចាប់តាំងពីលោកបានធ្វើរដ្ឋប្រហារទម្លាក់ប្រធានាធិបតីស្របច្បាប់ចេញពីតំណែង នៅអេហ្ស៊ីប។ វត្តមានរបស់លោកអាល់ ស៊ីស៊ី នៅសេតវិមានបានបណ្តាលឲ្យមានការរិះគន់ពីអង្គការការពារសិទ្ធិមនុស្ស Human Rights Watch ដែលបានចាត់ទុកលោកប្រធានាធិបតីអេហ្ស៊ីប ជាមេដឹកនាំផ្តាច់ការ និងរំលោភសិទ្ធិមនុស្ស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៣
សម្រាប់លោកដូណាល់ ត្រាំ ប្រធានាធិបតីអេហ្ស៊ីប លោក អាល់ ស៊ីស៊ី គឺជាបុគ្គលដ៏អស្ចារ្យ ដែលបានចូលគ្រប់គ្រង ក្តោបក្តាប់ទាំងស្រុង ប្រទេសអេហ្ស៊ីប។ លោកដូណាល់ ត្រាំ បានប្រើពាក្យសរសើរទាំងនេះ នៅពេលលោកបានជួបប្រធានាធិបតីអេហ្ស៊ីប នៅទីក្រុងញូវយ៉ក នៅខែកញ្ញា ឆ្នាំមុន ពោលគឺនៅប៉ុន្មានខែមុន ការបោះឆ្នោតប្រធានាធិបតីអាមេរិក។
ប្រធានាធិបតីអេហ្ស៊ីប លោកអាល់ ស៊ីស៊ី ស្ថិតក្នុងចំណោមមេដឹកនាំបរទេសដំបូងគេ ដែលបានទូរស័ព្ទ ទៅអបអរ លោកដូណាល់ ត្រាំ ដែលទើបបានឈ្នះឆ្នោត ក្លាយជាម្ចាស់សេតវិមាន។ ប្រធានាធិបតីអេហ្ស៊ីប ទទួលស្វាគម ដោយប្រធានាធិបតីអាមេរិក នៅ សេតវិមាននៅថ្ងៃចន្ទនេះ។ នេះជាលើកទី ១ សម្រាប់មេដឹកនាំអេហ្ស៊ីប។ តាមមន្រ្តីទទួលខុសត្រូវអាមេរិកាំង ម្នាក់ ដែលដកស្រង់សំដីដោយទីភ្នាក់ងារព័ត៌មានបារាំង AFP លោកប្រធានាធិបតីដូណាល់ ត្រាំ នៅតែកោតសរសើរលោកអាល់ ស៊ីស៊ី ដែលបានប្រើកណ្តាប់ដៃដែក ដើម្បីគ្រប់គ្រងបានទាំងស្រុងស្ថានភាពអេហ្ស៊ីប ដែលនៅក្នុងនោះមានផងដែរ វិធានការប្រឆាំងភេរវនិយម។ ដូច្នេះ នៅសេតវិមាន លោកដូណាល់ ត្រាំចង់ស្តាប់យោបល់របស់លោកប្រធានាធិបតីអេហ្ស៊ីប ក្នុងរឿងប្រយុទ្ធប្រឆាំងនឹងក្រុមជីហាត អង្គការរដ្ឋអ៊ីស្លាម ហើយនិងជម្លោះអ៊ីស្រាអែល ប៉ាឡេស្ទីន។
ទទួលជួបមេដឹកនាំអេហ្ស៊ីប ដែលកំពុងប្រើនយោបាយផ្តាច់ការ ចាប់ និងធ្វើទារុណកម្មមនុស្ស គឺជាជំហរដ៏ចម្លែករបស់សេតវិមាន។ នេះជាការវាយតម្លៃរបស់លោកស្រី Sarah Margon ប្រធានអង្គការការពារសិទ្ធិមនុស្ស Human Rights Watch ដែលមានទីតាំងនៅទីក្រុងញូវយ៉ក។
សូមបញ្ជាក់ថា ដោយសារបញ្ហាប្រជាធិបតេយ្យ អេហ្ស៊ីប សម្ព័ន្ធមិត្តរបស់អាមេរិក ធ្លាប់មានទំនាក់ទំនងស្មុគស្មាញ ជាមួយអាមេរិក នៅក្នុងអាណត្តិរបស់លោកអូបាម៉ា។ លោកអូបាម៉ាធ្លាប់បានផ្អាកជំនួយយោធាដល់អេហ្ស៊ីប នៅក្រោយពេល លោកអាល់ ស៊ីស៊ី បានធ្វើរដ្ឋប្រហារ និងចាប់ដាក់ពន្ធនាគារ ប្រធានាធិបតីស្របច្បាប់ លោកមូហាមេដ ម័រស៊ី នៅឆ្នាំ ២០១៣។ ប៉ុន្តែ តួនាទីដ៏សំខាន់ និងមិនអាចខ្វះបានរបស់កងទ័ពអេហ្ស៊ីប នៅក្នុងតំបន់អារ៉ាប់ បានធ្វើឲ្យអាមេរិករបស់លោកអូបាម៉ា បានបន្ទន់ជំហរ និងត្រលប់មកផ្តល់សព្វាវុធធុនធ្ងន់ឲ្យអេហ្ស៊ីបវិញ នៅឆ្នាំ ២០១៥។
ក្នុងមួយឆ្នាំៗ អេហ្ស៊ីប ទទួលជំនួយពីសម្ព័ន្ធមិត្តរបស់អាមេរិកប្រមាណ ១ ៥០០លានដុល្លា ដែលក្នុងនោះ ១ ៣០០លានដុល្លារ ជាជំនួយយោធា។ លោកដូណាល់ ត្រាំ ដែលបានប្រកាសកាត់បន្ថយជំនួយអន្តរជាតិ នៅក្នុងអាណត្តិរបស់លោក បានសន្យាបន្ត រក្សាជំនួយសំខាន់ សម្រាប់សម្ព័ន្ធមិត្តអេហ្ស៊ីប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ